نحتفل في 8 مارس من كل عام منذ 2011، باليوم العالمي للمرأة؛ وهناك دولًا تحتفل به بطريقتها وذلك بمنح النساء العاملات أجازة في هذا اليوم مثل الصين وروسيا وكوبا (دا كلام كفار ملناش دعوة بيه)، أما في مصر فكل ما تفعله “من تحمل صفة أنثي على بطاقة الرقم القومي..أو كلمة female في معلوماتها على مواقع التواصل الاجتماعي أن تكتب على صفحتها على الفيس بوك (دا لو عندها فيس) أو تويتر : «النهاردة اليوم العالمي ليا مع أيموشن قلب وابتسامة رضا عجيبة”، مع أنها من شوية كانت في الشارع وهي في طريقها للعمل تلعن كونها امرأة في هذا المجتمع، بدءًا من التحرش إلى عبارة: خليكوا في بيوتكم أحسن مدام بتضايقك الزحمة، وجملة عريضة كتبت على الميكروباص “ينتهي الغلاء إذا حجبت النساء) أو تحجبت في ميكروباصات أخرى، ومضايقات في العمل من نوعية المزاح المر: الستات مكانها في البيت، أصلا الست دي ملهاش شغل، بكرة تتجوز وتاخد سنتين تلاتة أربعة بعد الولادة يعني خسارة للمؤسسة..ألخ ..ألخ ..ألخ
عزيزتي المرأة المصرية لسه مصرة أن اليوم دا يومك طيب سؤال: بأمارة أيه؟ فاكرة لما اتضربتي في التظاهرات فاكرة لما اتسحلتي في المظاهرات فاكرة لما متي في المظاهرات.. فاكرة لما كان رد الفعل على كل الانتهاكات دي : ايه اللي وداها هناك؟، لسه مصرة أن اليوم دا يومك، فاكرة لما اتحرشوا بيكي في الشارع ولاقيتي اللي بيقولوا تستاهل ايه اللي لبساه ده؟..طب فاكرة لما تجاهلوكي في أهم الوزرات واودكي وزارت نص لبه (وزيرة الدفاع في ألمانيا امرأة)؟ طيب ماعلينا : فاكرة لما فكرتي تعمل يوم للبس الفستان اتقال عليكي ايه؟ .. برضو مصرة أن دا يومك.؟ طيب فاكرة أختك السورية لما جت تستنجد بشهامة وكرم المصريين وبقت سلعة رخيصة بدل ما يحموها؟
عزيزتي حواء.. أيتها المخلوقة المصرية المؤنثة هذا اليوم العالمي للمرأة ليس يوم لكل من حملت صفة أنثي. دا يوم عشان تقولي انتي حققتي ايه وبحتفلي بأنتصارك فيه، وبتطالبي بحقوق جديدة مش بتحتفلي بنعمة قصدي بنقمة انك مرأة.
معلش..الصورة قاتمة شوية ، بس للأسف هي دي الحقيقة.. وكمان الحقيقة أقتم من كدة بكتير، لأن أكثر من 90% من اللي بتعرضوا للانتهاكات من النساء في مصر مش بيتكلموا وبيسكتوا لأنهم مش هينولهم غير الفضيحة في مجتمع شايف أنك عالة وزيادة، وجاية تزاحمي ذكوره في الشوارع والعمل..وهيبقى الرد ف الوقت ده مش ايه اللي وداها هناك؟ هيبقى :ايه اللي جابك عندنا؟.
8 مارس من كل عام اليوم العالمي للمرأة اللي صرخت في وش الظلم ولسه بتصرخ عشان تنال كل حقوقها .مش يوم لبوستات وصور على الفيس بوك تعلني فيه أنك أنثي. أنا مش شايف أيتها امرأة، طول ملناش كلمة مسموعة طول مانتي مش نص المجتمع بالفعل طول مانتي جزء زيادة منبوذ مضطهد فقط كتواجد للزينة والزواج ومصنع لتفريخ أولياء العهد وياريت يبقوا ذكور عشان متبقاش سنينك سودا. عزيزتي المصرية .كل سنة وأنتي جميلة بيكي وبدورك مهما أنكروه .كل سنة وانتي قلب المجتمع ونص الدنيا ونصه الحلو .غصبا عن أي حد.
