الجواز ده مش كل أحلام البنت وطموحاتها في الحياة..مش معنى إن البنت لو متجوزتش إنها يبقى عندها اكتئاب وخلاص هتموت من الحسرة أو إنها متجوزتش يبقى تروح تنتحر وتموت وكدة نهاية الدنيا.
لا خالص على فكرة، لإن طبعا مش معنى إن البنت اتجوزت إن كده خلاص بقى هي مش عايزة حاجة تانية؛ البنت ليها أحلام كتير جدا منها الجواز، بمعنى إنها عايزة تشتغل وتنجح في شغلها وتثبت ذاتها ويبقى ليها شخصية وكاريير خاص بيها وتكمل دراسات عليا كمان لو عايزة، يعني ده مستقبلها برضه ..ومش مجبرة توافق بأي جوازه والسلام.
البنت اللي متأخر جوازها مش معيوبة ولا حاجة..ولا ناقصها إيد أو رجل.. ولا حتى محتاجة شفقة من حد ولا ممصمصة شفايف ولا كلام بقى من عينة يا عيني يا بنتي…ليه كده؟؟؟ ، ده انتي حتى أمورة و حلوة؟؟؟ هم الرجالة اتعموا ؟؟؟
ويا سلام بقى لو البنت دي مستواها الاجتماعي والمادي عالي شوية..يبقى الكلام: أمورة وحلوة وشخصيتك كويسة وبنت ناس وقاعدة من غير جواز؟؟؟؟ ليه كده هي الدنيا مبقاش فيها خير.
متفتكروش إن مفيش حد بيتقدملها أو بيعبرها..بالعكس بيتقدم كتير بس هي بقى اللي مش بتوافق بأي حد..مش أي عريس والسلام, هي كمان ليها متطلبات في الراجل (مش الذكر) الفرق كبير جدًا, هي عايزة راجل..راجل بما تحمله الكلمة من معنى.
راجل يشيل مسئولية كل حاجة معاها..راجل يوفر لها أمان وحماية..راجل يحبها ويخاف عليها..راجل يكون متوافق مع شخصيتها, وميحاولش يلغي شخصيتها أو يقلل منها ولا إن رأيها ملوش لازمة راجل يحافظ على كرامتها وتبقى كرامته من كرامتها وميهنهاش ويحترمها..راجل ياخد رأيها في كل حاجة في حياتهم..راجل يخليها شريكته في كل حاجة وأي حاجة.
راجل يخليها تنجح في شغلها ويساعدها على ده مش يبقى عايزها تفشل عشان يبان إنه ناجح ..وميحسسهاش إنها ولا حاجة, لإن البنت دي أهلها ربوها أحسن تربية وصرفوا عليها وعلموها كويس جدا وبقى لها شخصية ورأي وقيمة في المجتمع, متجيش بقى سعادتك تحاول تمسح كل ده..لأنها ببساطة مش هتوافق.
المثل اللي بيقول ضل راجل ولا ضل حيطة ده مثل غلط, فاشل، وغير واقعي لإن البنت مش محتاجة ضل حد..ولا ضل راجل ولا ضل حيطة..محتاجة الراجل نفسه مش ضله.
لازم كمان الأمهات تفهم الكلام ده, ويربوا المجتمع كله على كده..ومفيش حاجة اسمها جوازه والسلام.
يعني مثلا تسأل الأمهات انتي عايزة بنتك تتجوز ليه..تقولك مظهر اجتماعي.. واللي تقول عشان الناس بتتجوز..واللي تقول شر لابد منه..واللي تقول عشان الناس متقولش عليها إنها معيوبة..واللي تقول عشان الناس متقولش إنها عانس..كل ده كلام فاضي وملوش معنى خالص.
الجواز مش كده يا ناس..مش كده يا بشر..الجواز مودة ورحمة وعشرة وحب ..ايوه حب..مينفعش البنت تتجوز عشان الناس..مش أي حد كويس ومناسب يبقى خلاص يلا تتجوزيه..لازم يبقى فيه قبول ولازم يبقى فيه حب قبل الجواز -في الخطوبة قصدي– مش يبقى اتجوزيه وبعد الجواز تحبيه..وفرضا بعد الجواز محبتوش..يبقى إيه مصير الجوازه دي؟؟؟ ولا كده يبقى خلاص مكتوب على البنت تعيش العيشة دي لمجرد بس إن الناس متقولش حاجة؟؟؟؟ لازم الأهل يفهموا إن فيه حاجة اسمها حب..ايوه الحب موجود فعلا, مش معنى إن انتوا مجربتوش أو معشتوش الحب أنه مش موجود.
رسالة لكل بنت متتجوزيش أي حد عشان كلام الناس, متتجوزيش أي جوازة والسلام..متعشيش عيشة وحياة انتي مش عايزاها عشان كلام الناس..الناس مش هيعيشوا معاكي, الناس مش هتحس بيكي, الناس في كل الأحوال هتتكلم, يبقى عيشي حياتك زي ما تحبي وزي ما انتي عايزة وسيبك من كلام الناس لأنه ولا بيودي ولا يجيب.
طالما مش بتعملي حاجة حرام يبقى الناس تولع.