حزن الكثير لخبر موتها وشائعة انتحارها، سامحها أصدقاؤها، ودعا لها كل من يعرفها ومن لا يعرفها، وتذكّروها بصورها المبهجة.
ولكنها بعد يوم من وفاتها خرجت ندا لتكشف حقيقة ما جرى لها، وتمسح دموع محبيها، وترسم بسمة أمل جديدة، كما اعتادت طوال عمرها.
ندى قالت إنها تعرضت للعديد من المشاكل فى الحياة، فشلت فى أن تجد حلولا لها، واعتقدت أن الموت حل نهائى للتخلص منها. وأشارت إلى أن الناس سامحتها لمجرد أنها سمعت بموتها، ومفارقة جسدها للحياة، مؤكدة أنها حاولت الانتحار بالفعل 5 مرات، فى ثلاثة أيام.
واعتذرت ندى لمن لم يكن يعرفها، وحزن من أجل فراقها، واعدة إياهم، بأنها ستحصل على فرصة جديدة فى الحياة، لتتعامل مع مساوئ هذا العالم.
وكانت وترت شائعة انتحار ندى سلامة، الأجواء بين كل من يعرفها، والجميع حاول الوصول لها واستيضاح المسألة، بسؤال أقرب أصدقائها الممثل المسرحى على قنديل، ولكنه لم يكن يعلم أكثر من تلك الرسالة الغامضة التى وصلته من أختها، وبعد مرور يوم على الرحيل (الكاذب) لصديقته، ظهرت مرة أخرى لتعتذر نيابة عن ما قالته أختها سحر.
وحول تلك الحادثة التى شغلت الجميع اكتفى علّى بكتابة بكلمة تلخص الأمر “إخص!”.
وعاد ليعتذرعن انتهاكه للخصوصية
آخر بوست فيما يتعلق بالانتحار والكذب وخلافه بعتذر إني انفعلت وذكرت في أحد البوستات حاجة الناس اعتبرتها فضح لخصوصيات أو …
Posted by Ali Quandil on Monday, June 15, 2015
واعتذر عن الحدة بالحديث فى البوست الأول والذى بدئه مستطردًا متسائلًا: “ليه ندى فضلت ساكتة وبعد م الدنيا ولعت والناس بدأت تشتمنى.. بعتت تعتذر لى عن اللي أختها عملته معايا؟؟؟”.
1-
جميل..
إن حد يحب إنسانة فعلاً كانت عزيزة عليه فوق الوصف، وكان بيحاول طول الوقت يمنع عنها الأذى ويحميها من نتايج أخطائها
مشهد إتكرر كتير.. إن حد “له حق عند #ندى_وهيب” يجي لي بيتي ويقولي: “انت عارف إني أقدر أعمل وأسوّي في ندى بس عامل إحترام ليك عشان عارف إنها صاحبتك”
المشهد ده إتكرر كتير.. وكل مرّة كنت بطلب الصبر وعدم إيذائها..
وأنا عارف كويس أوي إنهم لو أذوها يبقى حقهم..
الموضوع دخل فيه فلوس وبمبالغ اللي أعرفه منها يعدي الـ 70 ألف جنيه!
بالمناسبة انا بعتذر لكل واحد أنا مَنعْته ياخد حقه منها!
(حضر الموضوعات دي صديقي @Abd El-Rahman Magdy
2-
يجيني خبر وفاتها.. أتصدم، وقلبي يتكسر..
أزعل إنها ماتت، وإنها ماتت وهي مسببّة مشاكل لناس كتير
وأحزن جداً لإنها بهدلت نفسها ومكانش ينفع تعمل كل ده
أتصل بأختها.. “#سحر_وهيب”.. اللي فكرتي عنها إنها إنسانة طيبة ومحترمة ومش بتاعة لف ودوران
3-
تفاصيل المكالمة:
علي: سلام عليكوا..
سحر: وعليكم السلام
علي: أنا علي قنديل يا سحر..
سحر: أهلا يا علي إزيك..
علي: الحمد لله بخير،،، سحر أنا بسمع حاجات غريبة ومش مستوعب.. هي ندى مالها..
سحر: (تبكي) أيوه يا علي..
علي: !!!! ندى اتوفت؟
سحر: الله يرحمها.. إحنا دفنّاها امبارح في البلد في كفر الشيخ.. ولسه راجعين النهاردة الصبح..
علي: لا حول ولا قوة إلا بالله.. لا حول ولا قوة إلا بالله!! طب انتوا فين دلوقتي؟
سحر: في البيت..
علي: طب آجي لكوا ازاي؟
سحر: (تبكي) لا مش هينفع إحنا تعبانين ومش قادرين نقابل حد يا علي معلش.. أنا آسفة بجد
علي: لا أبداً مستوعب يا سحر.. لا حول ولا قوة إلا بالله! طب العزا فين؟
سحر: مش عارفة والله يا علي أنا معرفش أي حاجة..
علي: طب سحر.. ده رقمي الخاص أرجوكي لو احتاجتي أي حاجة كلّميني على طول.. انتي عارفة ندى بالنسبة لي إيه..
سحر: (منهارة) أكيد يا علي عارفة طبعاً ربنا يخليك..
علي: ربنا يرحمها يا رب.. أنا مش هطوّل عليكي عشان عارف إنك أكيد تعبانة دلوقتي.. تليفوني مش هيتقفل يا سحر.. أرجوكي أول م تحتاجتي حاجة قوليلي..
سحر: (باكية جداً) حاضر يا علي.. متشكرة جداً بجد
علي: ربنا يرحمها يا رب.. سلام عليكم
……………………………
4-
المكالمة دي بعد مكالمة مع صديقي Taha Desouky
قالي إن سحر بعتت له رسالة (بتطلب منه) يقول للناس خبر وفاة ندى!!
لحد م أنا اتصلت بسحر أخت ندى وأكدّت لي الخبر زي م حكيتلكوا كده!
بالمناسبة “سحر” طلبت نفس الطلب من حسام أنتيكا المُصوّر
……………………….
5-
إيه الحكمة من الموقف ده؟
وليه “ندى وهيب” م انكرتش ده؟
وليه “سحر” أختها تقول للناس إنها اتوفت؟؟
وليه في الآخر أنا اللي أدفع تمن حزني عليها والناس تشتمني أنا وكإني أنا اللي اخترعت قصة وفاتها؟؟
عدد مهول من الناس بيشتمني أنا دلوقتي!!!
رسايل وتعليقات ومنشن!!
ويقولولي إبقى إتأكد عشان متسوّحش الناس؟ هو لما أختها ترد عليّ وهي بتعيّط ومنهارة وتقولي إنهم خلاص دفنوها!!! عايزني أتأكد من مين؟
…………………….
الخلاصة..
امبارح.. كنت في منتهى الحزن على إنسانة بحبّها جداً ومقصّرتش معاها..
والنهاردة بتشتم لإني بلّغت الناس بخبر وفاتها أملاً في إن ربنا يكتب لها دعوات صادقة بالرحمة والمغفرة ولآخر سطر كنت ببعت رسالة لكل اللي زعلانين منها يسامحوها!
وقفشت مع ناس كتير جداً أشاعوا خبر انتحارها لإنه غير مؤكد! وأنا مجيبتش سيرة انتحار أصلاً!
من النهاردة أنا معرفش واحدة اسمها ندى سلامة وهيب، ومش هحب أبداً إن حد يفتح معايا الموضوع ده تحت أي ظرف!
وبالمناسبة: إكتشفت النهاردة إن اسمها الحقيقي “#هند” مش #ندى!
أتمنى نعمل شير للصح.. زي م عملنا شير للغلط
ربنا يسامحها هي وأختها وكل اللي بيشتموني
شكراً!”