النهاردة اليوم العالمى للسعادة 20 مارس ودة اليوم إلى اختارته الأمم المتحدة علشان تقر بأهمية السعادة للعالم كله، طبعا من وجه نظرنا كشعب مصرى هنقول “هو اية الهيافة دى واية اللى هيخلينى مبسوط أصلا” ودة طبعا لإن عمرك ما فكرت ازاى تكون سعيد بالرغم من إن الموضوع بسيط جدا ويتلخص فى عشر حاجات بس لو تعملها هتخليك تعيش مبسوط وعلى ضمنتى:
لما حد يكشر فى وشك ابتسمله عادى وافتكر ان ” تبسمك فى وجهه اخيك صدقة “
لما تخاف من حاجة افتكر ” تفائلوا بالخير تجدوه “
لما تخسر حاجة مهمه فى حياتك افتكر ان ” قدر الله وماشاء فعل”
لو اتمنيت حاجة ومحصلتش افتكر ” وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ “
اتمنى الخير لغيرك وافتكر ” حب لأخيك ماتحبه لنفسك “
لو حد ضايقك افتكر ” التمس لأخيك سبعين عذرا “
لو فى يوم لقيت والدتك او والدك انتقدوك او زعقولك افتكر ” وَبِالْوَالِدَيْنِ إِحْسَاناً “
لما تحصلك مشاكل فى حياتك ماتركزش على المشاكل وتبص لنص الكوباية الفاضى لكن بص على النص المليان واكيد هتلاقى حاجة تخليك تقول ” إن مع العسر يسرا “
ولو واحدة دمها تقيل قالتلك مش هنفرح بيكى بقى وتتجوزى قوليلها “لو اطلعتم على الغيب لاخترتم الواقع “
واخيرا ساعد المحتاج مش بس اللى محتاجين فلوس لان فى الزمن دة فى محتاجين تانين اسمهم ” محتاجي السعادة ” دول بقى ماتبخلش عليهم بأنك تديلهم شحنه سعادة من اللى عندك وافتكر ان ” الحسنه بعشر امثالها” دة فى حد ذاته هيخليك تحس بالانشكاح .
لو عايز بقى تفتكر كل دة ممكن تكتبه وتعلقه فوق مكتبك على اليمين كدة.. علشان ماتفكرش ابدا تزعل و تضايق من اى حاجة وكمان ممكن تعمل حاجة تانية وتبدأ من النهاردة تكتب فى ورقة صغيرة اخر كل يوم اية اكتر حاجة حصلتلك النهاردة وخلتك مبسوط مهما كانت حاجة صغيرة زى انك قابلت حد كان واحشك صدفة او ان مديرك فى الشغل قالك لاول مرة برافووووو او انك حتى شربت كابتشينو بالكراميل لاول مرة وعجبك اوى.. وكل شهرين تلاته افتح العلبة دى وشوف اد اية حصلتلك حاجات بسيطة وفرحت وقتها بس انت نسيتها من زحمه الحياة وساعتها هتلاقى نفسك بتقول الحمد لله على كل شئ :)