روى الفنان أشرف زكي، نقيب الممثلين، مساء الثلاثاء، تفاصيل إلقاء القبض على الفنانة الشابة ميرهان حسين، واتهامها باقتحام كمين شرطة وسب أفراده، قائلًا: «البنت كانت سايقة عربيتها، لجنة وقفتها عايزة الرخص، وقالها اركني على الأرض، وهي بتركن خبطت في كتف الضابط، وبعد ذلك حدثت المشادة التي على إثرها أُلقي القبض عليها».
أكمل زكي، خلال مداخلة هاتفية لبرنامج «العاشرة مساءً»، مع الإعلامي وائل الإبراشى، عبر فضائية «دريم»، «خدوها قسم الشرطة والظابط قالها (إنتي ممثلة يعني كذا.. يعني عاهرة، وأنا مش عايز أقول اللفظ)، ظابط مصري بيلقب فنانات مصر بأنهم عاهرات، ده رأيه فينا، وبعدين فتش شنتطها وطلع (أندر وير) وقعد يشهر بيه أمام أفراد القسم، وبعدين دخلها الحجز، ودخلها الحمام اللي في الحجز، وجاب الجردل اللي فيه البول وسكبه فوقها».
وأضاف: «توجهت لقسم شرطة الهرم، وتقابلت مع ضابط الشرطة صاحب الواقعة، ومأمور القسم أنا شوفت ميرهان بعيني، والكلام ده على عهدتها، وأما شوفتها لقيته مبلولة من ساسها لراسها، الظابط كمان حجز اللبيسة اللي فوق الـ50 سنة اللي كانت معاها، وأخد تليفوناتها وشنطتها، وحاول سب الفنانة أمامى، وقام بتهييج عدد من المساجين عليّا أنا وإيهاب فهمي، عضو النقابة».
تابع: «البنت قالتلي المشاهد اللي بشوفها في السينما أكثر رحمة من اللي اتعمل معايا، مثلما حدث في فيلم (هي فوضى) تمامًا، لو البنت غلطانة تتشنق، وإحنا في دولة قانون، والبعض متخيل إن مفيش ربنا، لا في ربنا وفي عدل، هل الشرطة لها قانون خاص؟ فنانون مصر يطالبونني باتخاذ موقف تصعيدي عاجل ولكني سأنتظر لأرى ماذا يفعل عقلاء الداخلية أولًا».