عارف كده لما يبقى عندك 3 ولاد و بتتمنى تشوفهم حاجة كبيرة وعظيمة بالنسبة لمقاييس المجتمع بتاعك، والتلاتة يدوك مقلب حرامية ويروحوا يشتغلوا في نفس المجال اللي الناس وقتها شايفينه إنه مجال مش ولابد ووحش وأحيانا في ناس بتتطرف وتشوفه عار، لو عارف الإحساس ده يبقى إنت عرفت إحساس الأستاذ عبدالوهاب بيك حسن الموظف الكبير في وزارة المعارف، بعد ما أخد 3 صدمات في أولاده التلاتة سراج منير، وحسن، وفطين.
الأخ الأكبر سراج منير “مشروع طبيب”
سراج منير
سنة 1904 و تحديدا يوم 15 يوليو أنجب عبدالوهاب بيك طفله الأول، وسماه سراج منير، سراج بعد ما أتم البكالوريا سافر ألمانيا علشان يدرس الطب، وفي ألمانيا ولأن الفلوس اللي عيلته بعتتها قليله عليه حاول يدور على شغل جنب الدراسة، وتبدء رحلة البحث عن وظيفة لحد ما يشور عليه صديق ألماني بيعمل في مجال السينما إنه يشتغل في التمثيل، فتبدء رحلة تانية في البحث عن فرصة في استديوهات السينما الألمانية وفعلا، يلاقي سراج الفرصة ويبدء في العمل كممثل في عدد من الأفلام الألمانية الصامتة، مش كدة وبس ده كمان يحول دراسته من الطب للسينما.
طب هو ليه أصلا وافق على اقتراح صديقه الألماني بالعمل في التمثيل؟ أكيد ما حبش التمثيل في ساعتها، سراج كان عضو في فريق المسرح بالمدرسة الخديوية في مصر، بس قبلها حصلتله حادثة غريبة شوية لما عزمه أحد أصدقاءه على حفلة في بيته واكتشف سراج إن الحفلة كانت عبارة عن مسرح منصوب في الجنينة وكل المعازيم بيطلعوا يمثلوا، أما هو فكان المتفرج الوحيد اللي ما شاركش معاهم، وبعدها انضم لفريق التمثيل.
نرجع تاني لألمانيا -اللي أصلا عبدالوهاب بيه كان باعت إبنه سراج علشان يبعده عن شله المسرح- لما قرر سراج إنه يغير مجال دراسته من الطب للسينما يقابل المخرج المصري محمد كريم اللي كان بيدرس سينما هو كمان ، وبعدها يقابل واحد من مؤسسي المسرح في مصر وهو الفنان فتوح نشاطي، خلص كريم دراسة السينما و رجع وفتوح نشاطي رجع مصر وسراج مكمل دراسته والحرب العالمية على الأبواب وفجأة يجيله تلغراف “إلحق عايزينك معانا في فرقة مسرح في مصر” التلغراف ده يخليه يلم هدومه و يطير على مصر، ويشتغل جنب المسرح مترجم في وزارة التجارة، وبعدين ينضم لفرقة يوسف وهبي “رمسيس” وبعدين للفرقة الحكومية، ويختاره صديقه محمد كريم علشان يلعب دور البطولة في الفيلم المصري “زينب” قدام الفنانة بهيجة حافظ.
طبعا تخيل صدمه عبدالوهاب بيه في ابنه الكبير اللي كان مستني يستقبله طبيب قد الدنيا رجعله مشخصاتي، دي طبعا كانت صدمة إجتماعية في العيلة، غير كمان إن سراج رجع لقى عيلته وأهله بقوا في مراكز مهمة وهو مشخصاتي فقرر إنه يحقق مركز إجتماعي عن طريق الفن فكان بيحاول في المسرح إنه يقدم أدوار جد ودراما وأدوار رزينة كده لحد لما زكي طليمات في مرة وأثناء بروفات أوبريت شهرزاد يديله دور “مخمخ” وهو دور كوميدي هزلي بعيد كل البعد عن أدوار سراج وقتها، طبعا سراج رفض بشده وركب دماغه، بس عمنا زكي طليمات الله يرحمه كانت دماغه ناشفة أوي، علشان كدة سراج قدم الدور، وبعد ما كان عضو من أعضاء الفرقة،بعد الدور ده بقى واحد من نجومها وكمان من الممثلين اللي بيقدموا كوميديا و تعجب الجمهور ، وبعدها ياخد دور البطولة في مسرحية “سلك مقطوع” بعد ما يتعرض الفنان فؤاد شفيق بطل المسرحية الأساسي لأزمة صحية، وينجح سراج منير مرة تانية بسبب الكوميديا.
قدم سراج منير في السينما حوال 126 فيلم كممثل طبعا بين أدوار الجد و الشر و أدوار الكوميديا اللى كلنا تقريبا فاكرينها زي دوره في “عنتر ولبلب” ودوره في “القلب له أحكام” ودوره في فيلم نهارك سعيد” وغيرها، وكمان سراج منير هو أول واحد قدم دور عنتر على شاشة السينما سنة 1945 مع المخرج نيازي مصطفي وكانت اللى عاملة دور عبلة الفنانة كوكا برضوا، ومن نجاح الفيلم قدم سراج منير فيلم ابن عنتر سنة 1947 مع المخرج أحمد سالم، في نفس السنة يقدم مع كوكا و المخرج صلاح أبو سيف فيلم مغامرات عنتر وعبلة، قبل ما يجيي فريد شوقي ويعيد نفس الكلام ده تاني في الستينات.
وغير كونه ممثل متنوع هو كمان كان مخرج مسرح وأخرج لفرقة الريحاني اللى انضملها بعد كدة 3 مسرحيات وهما إوعى تعكر دمك، الستات لبعضهم ، ولزقة إنجليزي” وكمان أنتج للسينما فيلم واحد وهو فيلم حكم قراقوش اللى أخرجه فطين عبدالوهاب وكان بطولة زكي رستم ونور الهدى ومن تأليف بديع خيري ومحمود السباع، بس الفيلم ما نجحش وده كان سبب في توقف سراج عن الإنتاج وإصابته بالذبحة الصدرية.
سراج اتجوز من الفنانة ميمي شكيب سنة 1942 وكونوا وقتها ثنائي فني مهم ويمكن كان أهل الفن بيعتبروه أقوى زواج بالوسط الفني، والغريب إن سراج منير عاني كتير لحد ما أهل ميمي شكيب وافقوا على جوازه منها، وفي سنة 1957 وتحديدا يوم 13 سبتمبر يقابل سراج منير وجه كريم ويتعرضله بعد وفاته فيلمين وهما “حتى نلتقي، وسلطان”.
الأخ الأوسط المظلوم
بعد صدمة عبدالوهاب بيك حسن في ابنه الكبير سراج كان حلمه إن ابنه الأوسط حسن اللي اتولد في 4 يوليو 1910، يبقى حاجة مهمة وكبيرة أو يبقى حاجة غير إنه يبقى فنان، وفعلا دخل حسن عبدالوهاب كلية الهندسة و اتخرج منها سنة 1928، وبعدها سافر على باريس سنة 1933، قبلها كانت ندهته نداهة السينما كده من تحت لتحت، جنب شغله كمهندس، و جت سفرية باريس علشان يدرس في إستديوهات إكلير السينمائية في فرنسا لمدة 4 شهور، النداهة ندهت تاني ولادك يا عبدالوهاب بيه.
يرجع حسن عبدالوهاب ويبدء يكتب مقالات عن السينما و الفن ويراسل عدد من المجلات العالمية وبعض الجرايد المصرية لغاية سنة 1945، لما جاب أخوه الصغير فطين وخلاه مساعد مخرج ليه وجاب أخوه الكبير سراج وقدموا فيلم من إخراجه وتأليفه اسمه قلوب دامية ، وبالمناسبه كان حسن عبدالوهاب من أوائل الناس اللى قدمت الفنان صلاح نظمي وإديتله دور البطولة كمان.
حسن عبد الوهاب إسهاماته في السينما قليلة بس متنوعة يعني أخرج فيلمين وهما قلوب دامية 1945 وليت الشباب 1948، وكمان كتب أغاني 4 افلام تقريبا وهما “أنا بنت ناس 1951، أشكي لمين 1951، علشان عيونك 1954، أماني العمر 1955″، وغير كدة هو كتب للسينما 4 أفلام وهما قلوب دامية وأنا بنت ناس ، غضب الوالدين 1952، وخليك مع الله1954، وكتب رواية وبالوالدين إحسانا اللي اتحولت لفيلم سنة 1976، ومثل مرة واحيدة في فيلم شبح نص الليل 1947، ويتوقف حسن عن السينما و يبقى هو الولد الوحيد اللي شبه حقق أمنيه أبوه و ما اشتغلش في السينما أوي لحد ما يقابل وجه كريم في 15 ديسمبر 1985.
فطين الأصغر أجمل صدمات البيه
ولأن عبدالوهاب بيك حسن اتعلم من الدرسين اللى قبل كده فقرر إن إبنه الأصغر فطين مايسافرش بره تحت أي ظرف أو بأي حجة، فطين اللى اتولد في 22 نوفمبر سنة 1913، خلص دراسة الثانوية العامة و دخل كلية الزراعة ما عجبتوش وفضل يغيب منها لحد ما اتفصل و تلقائي حوله التنسيق على كلية فنون جميلة ودخل قسم عمارة ماعجبتوش برضوا فساب التعليم كله وراح اشتغل بالبكالوريا في إدارة الجوازات و بعدها دخل الكلية الحربية ليتخرج ظابط إحتياط في أول دفعة ظباط إحتياط سنة 1939، و فضل في الجيش لحد ما بقى نقيب و بعدين ساب الجيش كمان.
فطين اللى كان غاوي سيما من صغره و شاف إخواته الاتنين بيشتغلوا فيها بدء مشواره من بعيد أوي بدء من مساعد إنتاج سنة 1944 في فيلم بنات الريف، وبعدها بقى ملاحظ سيناريو لحد ما بقى مساعد مخرج مع أخوه حسن عبدالوهاب في فيلم قلوب دامية و بعدين مع المخرج حسن حلمي في فيلم “الخمسة جنيه” وغيرهم لحد سنة 1949 لما جاتله أول فرصة إخراج وقدم فيلم نادية اللى كان على عكس كل افلام فطين عبد الوهاب كان دارمي جدا.
بعدها بدء فطين رحلته في السينما ويقدم فيها حوالي 59 فيلم من أجمل الأفلام اللي قدمتها السينما المصرية، فطين عبدالوهاب هو اللي نقدر نقول عليه مخرج كوميدي من الطراز الأول مخرج يقدر يعمل إفية إخراج ويقدم كوميديا بعيدة عن فكرة الابتذال وكوميديا إجتماعية من الطراز الأول، لا ده كمان هو اللي ابتدى مع إسماعيل ياسين سلسلة افلام أسماعيل ياسين بفيلم ” إسماعيل يس في بيت الأشباح” سنة 1951، و الفيلم ده كان إخراجه و اشترك في تأليفه مع على الزرقاني، وبعده قدم أفلام كتير لإسماعيل ياسين منها الآنسة حنفي سنة 1954، إبن حميدو سنة 1957، العتبة الخضرا 1959، الفانوس السحري، حلاق السيدات 1960، وغيرها كتير.
وكمان قدم فطين أفلام زي الأستاذة فاطمة 1952، حكم قراقوش 1953، نهارك سعيد 1955، ساحر النساء 1958، إشاعة حب 1959، الزوجة رقم 13، و آه من حواء سنة 1962، عائلة زيزي، وعروس النيل و صاحب الجلالة سنة 1963، أنا وهو وهي واعترافات زوج سنة 1964، طريد الفردوس سنة 1965، مراتي مدير عام سنة 1966، كرامة زوجتى 1967، عفريت مراتي وأرض النفاق سنة 1968، وأخر افلامه أضواء المدينة 1972.
فطين زي ما كان مميز في السينما كمان كان محظوظ في حياته الخاصة فطين اتجوز أربع مرات الأولى كانت من الفنانة هاجر حمدي، و التانية كانت من الفنانة والنجمة ليلى مراد والتالتة كانت من النجمة تحية كاريوكا أما الجوازه الأخيرة فكانت قبل ما يموت بسنة وكانت من منيرة أخت الفنانة نجلاء فتحي، ويوم 11 مايو 1972 يموت فطين عبدالوهاب على سلم الطيارة بأزمة قلبية مفاجأة.