يعتبر الميكروباص من وسائل المواصلات التى يستخدمها معظم المصريين بشكل دائم فى حياتهم اليومية، وركوب الميكروباص فى مصر ليس بالمهمة السهلة والهينة حيث يتطلب قدرات بدنية ونفسية خاصة.
لذلك بدأ النشطاء على موقع التواصل الاجتماعى الفيس بوك برصد خبراتهم اليومية فى الميكروباص عن طريق تقديم ابرز القواعد لركوب الميكروباص ولكن بطريقتهم الساخرة المعتادة كعادة نشطاء موقع التواصل الاجتماعى الساخرة، حيث قاموا بتبادل العديد من العبارات والمقولات وعصارة خبرتهم التى من الممكن أن يتعرض لها راكب الميكروباص .
اقرأ ايضاً : 6 قوانين للميكروباص .. واللى مش عاجبه ينزل
1- متركبش ورا السواق عشان حتلبس فى لم الأجرة.
2-السواق مش هيوطي الكاسيت.. أجّل مكالماتك لحد ما تنزل.
3- متوقفش قبل تحويدة عشان لو الميكروباص وقفلك الناس اللي وراه مش هتسيبه في حاله عشان قافل عليهم الطريق.
4- الأربعة اللي على الكنبة اللى ورا لازم يقعدوا بالشكل ده • ° • °
5- جهز أجرتك من قبل ما تركب .. ولازم يبقى معاك فكة .
6- سيجارة السواق دى من المقدسات.. ما ينفعش تقوله يطفيها.
7- ابقى قوله على المكان اللي انت نازله قبلها بشارعين على الأقل.
8- وافق السواق في أي موضوع هو بيتكلم فيه عشان متدخلش في حوارات مالهاش لازمة.. السواق دايماً على حق.
9- الكرسي اللي جنب السواق ده مش ليك.. ما تفكرش تركب فيه عشان تبقى ضيف لطيف.
10- ذوق سواق الميكروباص في اختيار الأغاني والدباديب اللي في العربية دي حاجة مبنية على جرح قديم ومش قادر ينساه ومش موضوع للمناقشة.
11- عينك على جيبك طول الرحلة تجنباً للسرقات.
12- ربطات الحجاب العجيبة بتاعة البنات ممكن تضايقك وانت قاعد.. حاول تتجنبها بهدوء.
13- لازم يكون معاك كمامة صغيرة.. هتشكرني بعدين على الفكرة دي.
14- دايماً هتلاقي واحد بيفاصل في الأجرة مع السواق.. ده وحش سيبك منه.
15- المكتوب على ضهر الميكروباص دي حكمة مش حاجة بتضحك.
16- صور الطفل المعاق اللي هتلاقيها ده غالباً ابن السواق أو ابن أخته.
17- اللي نازل الأول بيركب برة.
18- انت متحرش في نظر أى بنت راكبه ميكروباص حتى لو لابس بدلة.. خليك عينك على جيبك زي ما قولنا عشان فيه بنات ما بتصدق يلاقوا حد بيبصلهم.
19- فى الميكروباص انت مسير مش مخير.
20- كونك إنك تمد إيدك للميكروباص اللي جنبك عشان تجيب منه فكة للسواق ده واجبك وانت مش بتخاطر بحياتك ولا حاجة.
21- متفكرش تبتسم.. انت في ميكروباص ومفيش أي حاجة تدعو للابتسام.
22- متطلعش موبايلك جوه الميكروباص عشان بيبقى ملكية عامة وبيبقى على الأقل 4 مركزين في الـNews Feed بتاعة فيسبوكك مش انت لوحدك.
23- فيه بني آدمين كده الميكروباص بيدوس عليهم وهو ماشي.. ما لناش دعوة.
24- الكلاكس بتاع السواق ده مش لتنبيه السواقين اللي حواليه.. ده بيتفاعل مع الأغنية اللي هو مشغلها.
25- الميكروباص مش بتاع حارات.. بتاع غرز.
26- كوباية الشاي الفاضية جنب السواق دي تقريباً الميكروباص بينزل بيها.. زي برضه الراجل التخين أبو شنب اللي دايماً تلاقيه جنب الازاز وعلى رقبته فتافيت مناديل.
27- لو قاعد جنب الباب هتفتحو وتقفلو لباقي الركاب اللي داخلين وخارجين.
28- قواعد المرور بالنسبة للسواق دي مجرد إرشادات وتسقط منها صفة الإلزامية.
29- لو لقيت السواق مشغل أغاني أجنبي اعرف إنك مخطوف.
30- الصوت العالى دليل على ضعف الشخصية لكن فى الميكروباص بيدل على قوة الشخصية
31- وأخيراً.. السواق مش بيقف.. الميكروباص بيفضل ماشي ولما سيادتك تيجي تنزل بيهدي بس.. وانت ولياقتك بقى.