فى ظل توقعات بزحام بالطرق العامة والكبارى يزداد غالباً فى شهر رمضان الكريم ، وضع شباب الفيس بوك قواعد وشروط لاستخدام كوبرى أكتوبر وقد رأى الشباب ان هذه القواعد هى الأمثل للاستخدام الكوبرى تفادياً لكثير من المشاكل التى تحدث غالباً .
1- ماتطلعش كوبري اكتوبر
2- الحاره اللي جنبك مش بتتحرك اسرع منك .. بطل تنطيط بين الحارات
3- مافيش حاجه اسمها الحاره اللي في النص اسرع
4- لو عندك مشوار بدري احجز مكانك من بليل
5- الاحسن ماتطلعش كوبري اكتوبر
6- لو عربيتك 132 او 128 او اي موديل قبل 2001 ابوس ايدك مش لازم تعطل فوق خليك تحت فرص نجاتك احسن
7- حاول تعمل علاقات مع اللي حواليك في احتمال كبير تلاقي نصك التاني
8- الوقت الوحيد اللي ممكن تستخدم فيه الكوبري باعلي كفاءه هو الساعه 4 الفجر
9- حاول تخلي كل حياتك في مكان واحد و اللي عايزك يجيلك بس ماتطلعش الكوبري
10- عمرك ماتلاقي المطلع واقف .. الكوبري عامل زي النداهه تطلع و تكتشف الكارثه فوق
11- الكوبري مسكون
12- رجوعك بضهرك عشان تهرب بعد ماتكتشف الكارثه غير انه غباء منك فهو مش حل.. الارواح الشريره هاتغضب عليك و مش بعيد انك هاتقضي اللي باقي من عمرك علي الكوبري
13- زحمه الكوبري عامله زي الرمال المتحركه كل لما تقاوم هاتغرق اكتر.. استسلم و ماتقاومش هاتوصل اسرع
14- ثبت علميا و بالدليل ان الكلاكس مش هايخليك توصل بسرعه
15- اي حد تعرفه بيطلع الكوبري يوميا ده يستحق السؤال عليه باستمرار لانه هايبقي وصل لمرحله من اللاوعي و فقدان الاحساس بالزمان و المكان
16- عشان ماتتعبش اعصابك ماتركزش مع يفط الاعلانات.. زمان كانت مليانه مزز دلوقتي مش هاتلاقي غير وائل الابراشي و احمد موسي
17- لو مصاحب واحده ساكنه في المهندسين و انت ساكن في مدينه نصر فركش معاها.. صدقني ربنا مش هايبارك
18- السبع عربيات اللي واقفين بيغيرو الكاوتش للمزه و منهم خمسه بس واقفين يسلوها, بما انكو معطلين الطريق كده كده علي بعد عشره متر قدام هاتلاقو اخوكو عربيته بتولع هاتبقي لفته لطيفه لو حد حاول يطفيها معاه
19- الراجل الغلبان اللي بيشحت ده بيكسب في اليوم قد مرتبك .. بلاش قلبك الحنين يخليك تقف و تعطل الناس عشان تديله الربع جنيه اللي ماكنتش عارف تخلص منه
20- عامل النضافه برضه شحات و شاري الطقم و المقشه ب 120 جنيه و دافع خلو الحته اللي واقف فيها ف ينطبق عليه القاعده اللي فاتت
21- اللي صمم الكوبري شخص سيكوباتي بيتلذذ بتعذيب الناس ماتطلعش الكوبري و تديله الفرصه دي
22- ماتأمنش للكوبري حتي لو فاضي دايما خلي عينك في وسط راسك .. اللي قدامك هايقف في اي لحظه و انت هاتخيش
من 23 ل 40 هي سرعتك علي الكوبري ماتحلمش باسرع من كده