توقع النجمة إسعاد يونس، كتابها الجديد “زى ما بقولك كدة”، الصادر عن دار نهضة مصر للنشر والتوزيع، فى تمام الساعة السابعة مساء الأحد المقبل، فى إحدى فنادق الزمالك.
تعاونت إسعاد فى الكتاب مع إياد صالح ومحمد حربى وإسلام صالحين. وفى مقدمة كتابها تقول:
شايفك وأنت ماسك الكتاب وبتقول: يا ترى هو الكتاب ده عن إيه؟
شوف يا عزيزى أو يا عزيزتى، مع مراعاة الفرق بين الجنسين، الكتاب ده بيتكلم عن “كل” حاجة.. آه والله زى ما بقولك كدة.
أصل إحنا لما سألنا نفسنا هو إحنا لازم نتكلم عن إيه لقينا إن كل الكلام بيوصل على كل الكلام وبياخدنا لكلام تانى.
أصل إحنا قررنا نتكلم عن حاجات بتحصل فى مصر، فلقينا نفسنا لازم نتكلم عن حاجات حصلت زمان فى مصر، طبعًا ده خلانا لقينا ناس بتعمل حاجات غريبة.. زى اللى بيركن صف تانى، ولا اللى بيكتب على حيطان، ولا اللى بيحط الكراكيب عالسطوح، فهوووب لقينا نفسنا بنروح للطب النفسى وأنواع الفوبيا اللى ممكن تجيلك فتعمل حاجات غريب.
باختصار، لو حابب تاخد لفة كدة، وتلف معانا لفة حلوة على شوية حكايات ومواضيع ومعلومات، يبقى أنت اخترت صح.
“أصل الكتاب ده” كله ثقافة وعلوم وفنون وبيسلى كمان زى السيما.
اسمع منى.. زى ما بقولك كدة.