الاجيال اللى بينها خلافات دلوقتى على السياسه, بتحاول تحل اللى يخصها وبس من غير ما تفكر فى ولادها او تأثير اللى بيحصل ده على جيل تانى لسه بيتعلم منهم
كله بيدور فى دايرته ومحدش واخد باله اخر الدايره ايه؟ صورة لست بتأيد الجيش ,ليها مطلق الحريه طبعا بس اللى ملهاش حق فيه انها تعلم ولادها الاطفال يحطوا جزمة حد فوق دماغهم ايا كان ده مين,او حد فى الطرف التانى بيعلم ولاده كره الجيش وبيحفظهم اغنية تنشل الايادى , المفروض يطلعوا عاملين ازاى !!
ده غير الجيل الصامت ,اللى باباه او اخوه اتقتل وكل اللى حواليه بيقولوا الجيش اللى قتله.او اللى باباه كان سهران على راحة غيره وبرده اتقتل ,وكل اللى حواليه بيدعوا على الاخوان الارهابيين اللى قتلوه فوقوا وانتبهوا لجيل شارب الكره مننا من غير ذنب .جيل التعليم مش هيساعدوا فى حاجه ولا هيوجهه صح لان هو نفس التعليم اللى عايزهم يجيبوا اعلى الدرجات اخر السنه وينسوا المنهج بعدها بيوم.
فوقوا عشان لو مفقناش للى جاى , 10 سنين وهنشوف جيل بيعمل فى بعضه حاجات اول ما نشوفها ,هنترحم على ايامنا ونقول يااه ده احنا كان قلبنا على بعض.