د. هشام عاشور مدير مستشفى ايسارليون فى ألمانيا وطبيب سرطانات النساء العبقرى اللى لما تجيب اسمه قصاد الخبراء يقولولك ده مجدى يعقوب بتاع النسا.
كتب شريف أسعد الكاتب ووعضو مؤسسة اسمعونا على صفحته الشخصية بموقع فيسبوك، الراجل ده مستفز جدا يا جماعة.. من كتر الاخلاق و الادب اللي هو فيه.. كل ما يسلم على حد ان شالله يكون عامل نظافة … يقوم يقف … وينحني … ايووووة …. ينحني زي اليابانيين كدة قصاد اللي بيسلم عليه … و عينه في الارض من الادب .
الراجل الجميل اللطيف ده خرج من مصر بعد ما رئيس القسم بتاعه.. دكتور شحيبر ابو فازلين… قال له نصا وحرفيا “انا مش هشغلك حتى خدام عندي”
والحقيقة ان رئيسه ده مشهور انه مجنون وبيضرب المرضى ، وإلى الآن بالمناسبة موجود في مستشفى جامعي شهير
كالعادة.. دكتور هشام عاشور لم الهدمتين اللي حيلته وهوووب طلع راح ألمانيا ومفيش في جيبه غير 4 الاف جنيه .
طلع بقى السلم من أوله… وألمانيا بقت تحلف بحياته…
عينته مدير مستشفى إيسارليون، وهي بالمناسبة مستشفى “حكومي”
المانيا اديته الجنسية الالمانية في مقابل تنازله عن المصرية… رفع قضية على المانيا
اه وربنا رفع قضية عشان يحتفظ بجنسيته المصرية
بيحكيلي د. هشام عن قانون في ألمانيا يمنع إعطاء الهدايا للأطباء، وازاي ان عائلة أمير سعودي جت تعمل عملية ، فحجزت المستشفى كلها عشان مايحصلش وجع دماغ، وازاي ان الأمير وهو ماشي أهدى الكل بما فيهم طقم التمريض ساعات رولكس، its a7eeh
ياخدوها؟؟ يلبسوها؟؟؟ بلححححح
راح الكل مسلمينها للإدارة اللي “باعتها” ودفعت ضرايبها، وبالباقي طوروا المستشفى وجابوا أجهزة كانوا محتاجينها.. انا زهقت
بيحكيلي د. هشام كمان ازاي انه سفير لمصر بالمعنى الحقيقي للكلمة ، وازاي ان أول حاجة بيقولها لأي حد بيشتغل معاه ، أي حد هيجيب سيرة مصر بحاجة وحشة مايشتغلش معايا، وازاي انه أحياناً يضحك ع الألمان لو شاف ورقة واقعة ف مكان ويقول لهم : يااااه لو انتو ف مصر .. حد يستجري يرمي ورقة زي دي ف مستشفى ؟؟ دي كانت تبقى مصيبة ارجوك كفاية …
د.هشام عاشور جه مصر متبرعاً بالكامل بالكشف على حالات حرجة عدد منها لو كان كمل كانوا هيستأصلوا الرحم ، لكنه بفض الله قال : فيه أمل .. وفيه حلول كتيرة غير استئصال الرحم..
دكتور هشام بعد ما قعد سنين ما ينزلش مصر.. اخر مرة وهو واقف معايا عند الرفاعي بتاع الكباب في السيدة.. عينه دمعت.. وقالي: يا اخي والله ما عاوز ارجع ألمانيا…
طبعا انا شبه ركبته العربية بالعافية وتقريبا طردته حيضيع مستقبله الراجل في لحظة كباب وكفتة…
دكتور هشام بقى ينزل مرة كل تلات شهور يكشف ويعمل عمليات للغلابة ببلاش…
دكتور هشام حس ان مصر بتنده عليه.. ساب اللي وراه واللي قدامه وجه على ملا وشه…
دكتور هشام لقى مرة اتصال جايله من المستشفى .. احنا عارفين انك كنت يوم واحد يا دكتور ، بس فيه واحدة ست كبيرة قاعدة ع الباب وبتقول مش همشي الا لما يكشف عليا الدكتور هشام، فنزل وراحلها وكشف عليها وادالها فلوس العلاج
دكتور هشام اثناء تكريمنا ليه … قالي انا متابعك من زمان يا “شيرف” و مبسوط قوي ان في ناس في مصر زيك و يا ريت تقدروا تكلموا المشوار …
عيني دمعت والله … و حسيت اني عملت حاجة لمصر انا و الناس اللي معايا بعيد عن قرف السياسة…
احنا في مؤسسة اسمعونا بنتحمل تكاليف العمليات اللي بتتعمل لغير القادرين في افضل مستشفى مجهزة في مصر…
لو حابين تساعدونا.. بخمسة جنيه رسالة حلوة.. عشان الراجل الحلو ده… نساهم في استئصال ورم ناس عايشة بيه سنين.. ونساعد في منح فرص جديدة للحياة..
رسالة بخمسة جنيه على ٩٢٣٩٢
أستأذنكم تنشروا الكلام ده وتشيروه، مش بس عشان الناس تعرف ان فيه أمل
لكن كمان عشان نقول
#شكراً_هشام_عاشور
ودي أقل شكراً ممكن نقولها ف حياتنا لحد محترم زي الراجل ده