اظن اسم العربية واضح لأي حد عريبة السيدات،يبقي مين اللي المفروض يركبها أكيد مش كائنات فضائية،وأكيد برضه مش كائنات رجاليه..أيوه احنا بس اللي من حقنا نركب العربية دي..عربية الستات..
يمكن في أول الموضوع كانت الدنيا فيها حبة لخبطة والناس مكنتش لسه متعودة علي موضوع إن في عربية مخصوص للستات،لكن بعد كده بقي الوضع طبيعي،وتخيلوا بقي لما بيركب راجل عربية الستات ايه اللي بيحصله ؟؟؟
اللي بيحصل بيكون متوقف علي الراجل نفسه يعني هل هو ركب العربية و هو مش واخد باله انها عربية ستات لو ده السبب الراجل يا عيني بيبقي مكسوف و يقعد يعتذر لحد ما ينزل من العربية في المحطة اللي بعدها طبعا بعد نصايح من كل الستات انه لازم يقف عند اخر باب في العربية عشان يلحق يركب العربية اللي بعدها وانه ياخد باله المرة الجايه والكلام اللطيف ده…
لكن الموقف هيكون مختلف تماما لو الراجل ركب و عمل فيها مش واخد باله انه في عربية كلها ستات،وانه الراجل الوحيد في العربية لا و ايه كمان يقعد و ياخد مكان ست من حقها كمواطنة في عربية السيدات انها تقعد مش تفضل واقفه عشان سي السيد يقعد و يرتاح…
الموقف بيبدأ إن كل الستات بتبص للراجل ده بقمة الاشمئزاز و القرف اللي في الدنيا لكن طبعا الراجل بطبعه بارد و متفرقش معاه بصة الكائنات دي و يعمل نفسه مش واخد باله و مش بعيد يروح دابب وشه في الشباك عشان نظرات الستات الشريره ضايقته وفي الوقت ده الستات بينقسمو نصين نص بيقعد ساكت و بيكتفي انه يرمي نظره اشمئزاز من وقت للتاني و نص يقول مبدهاش و ينطلق بقي الاول الكلام بيكون بذوق فتلاقي ست تقول يا استاذ حضرتك مش واخد بالك ان دي عربيه سيدات؟؟ و الرد عاده بيكون مستفز فتلاقي بيقولها ايوه و دي فيها ايه يعني؟
وتبدأ الستات تزعق و الرجل بيرد ببرود فواحدة تقوله ما انتوا عندكوا باقي التسع عربيات اركب في اي واحده منهم يرد بكل استفزاز العربيات كلها زحمة و أنا مش قادر أقف ( لا يا راجل تصدق رد مقنع فعلا) واحدة تانية تقوله أنت كده عامل مخالفة و هتدفع غرامة و أنا هنادي العسكري المحطة الجاية فيكون الرد الصادم أنا أصلا نازل المحطة الجاية…
و بعد كل الخناق ده و حرقة دم كل الستات اللي في العربية الراجل بينزل من العربية و في عينه نظره شماته لكل الستات اللي في العربية وبيبقي ناقص يطلع لهم لسانه و يقولهم هنفضل كابسين علي نفسكو لاخر لحظه…
وأنا هنا تعليقي الوحيد (حسبي الله و نعم الوكيل)