لا يصح إلا الصحيح .. جمله كلنا بنقولها و بنسمعها .. بس هو ايه الصحيح ؟؟ يعني الصحيح من وجهه نظري اكيد مخنلف تماما عن الصحيح من وجهه نظر حضرتك .. واللي أنت شايفه صح أنا ممكن جدا أكون مقتنعه انه أكبر غلط في الدنيا .. كلامي مش علي الثوابت المتفق عليها دينيا لان دي مفيهاش كلام .. لكن غير كده مفيش حاجه ثابته .. الغلط و الصح حاجات نسبيه جدا بتختلف باختلاف الثقافه و المجتمع الي احنا عايشين فيه ..
العيب و اللي مش عيب حاجات نسبيه بتتحدد علي حسب التربيه و البيئه اللي طلعنا فيها .. يعني في اماكن ممكن تلاقي العيب ان البنت تقعد بره البيت لوقت متأخر و اصلا الوقت المتأخر ده بردو بيختلف من مكان للتاني ..
يعني في اماكن الوقت المتأخر ممكن يبقي الساعه 9بليل و اماكن تانيه ممكن يبقي 12 بليل و في اماكن تالته ممكن الوقت يزيد شويه فيبقي المتأخر اي وقت بعد نص الليل .. فهنا نلاقي الناس بتقول ميصحش البنت تقعد بره البيت لوقت متأخر كده .. بس بنلاقي موضوع تأخير البنت بره بيتها ده بيصح في اماكن تانيه بيكون فيها عادي البنت تفضل بره البيت لاي وقت و مفيش مشاكل لو باتت بره كمان و محدش بيبصلها علي انها مش محترمه او انها عملت حاجه ميصحش تعملها .. ده مجرد مثال لفكره اللي يصح و اللي ميصحش في مجتمعنا و طبعا الامثله كتيره غير موضوع التأخير ..
عندك مثلا ميصحش البنت تكلم زميل ليها في الشغل في وقت متأخر او العكس مينفعش هو يتصل بيها بليل .. ليه يا سيدي .. اهو كده عيب و ميصحش مكالمات بليل .. علي اساس انهم لو عاوزين يقولو كلام قبيح مش هيعرفو يقولوه الصبح مثلا ..
المصيبه الكبيره اننا بنحكم علي اللي يصح و اللي ميصحش من وجهه نظرنا احنا و بندي نفسنا الحق اننا نقول علي حد مش محترم و ميصحش اللي هو بيعمله لمجرد انه مختلف عن مفهومنا احنا عن الصح و الغلط ..
محدش جرب يفكر بطريقه الشخص التاني و يشوف هو من وجهه نظره ايه الصح و ايه الغلط .. و محدش جرب يعمل حاجه احسن من كل ده .. انه يبطل يحكم علي الناس و يقرر ايه اللي يصح و ايه اللي ميصحش و يخليه في نفسه و ملوش دعوه بحد .. فكر كده شويه هتلاقي انك تخليك في حالك و تبطل تحاكم الناس و تقول ايه الصح و ايه الغلط هو احسن حاجه في الدنيا عشان في النهايه … لا يصح إلا الصحيح.