أم كلثوم بالنسبة إلى مش فكرة عظمة ومعجزه وصوت جبار وكل الكلام اللى أتقال عليها ولسه بيتقال
أم كلثوم بالنسبة إلى إحساس عشان كده يمكن مكنتش بحبها وأنا طفله لإنى مكنتش فاهمه الإحساس أصلا.
مكنتش فاهمه إنك لما تحب تعاتب حد كفايه تسمع “إسأل روحك” وتسمع نبرة العتاب وجماله فى كل جمله،
ولما ياخدك إحساس الحب لشخص وتسمع “أنت عمرى” صوتها وأحساسها هيخليك تحب حبيبك أكتر،
ومحدش فينا بيحس بفرحة العيد إلا مع صوتها وهى بتقول “يا ليلة العيد أنستينا”،
وبالنسبالى أم كلثوم هى صوت مصر ولما بسمعها بتقول “أنا إن قدر الإله مماتى لا ترى الشرق يرفع الرأس بعدى” بشوف فى ثانيه عظمة مصر ومكانتها وحضارتها فى صوتها وقوة احساسه ومفتكرش أن حد غيرها كان ممكن يغنى “مصر تتحدث عن نفسها”.
سر عظمة أم كلثوم هيفضل إحساسها بكل حرف بتغنيه وازاى بتقدر بروعة صوتها توصل لقلوب الناس مش بس سمعهم.