تربينا على مأثورات ومقولات من أهالينا جعلت طفولتنا لها طعم خاص وعجيب
١. يا شمس يا شموسة :
و احنا صغيرين في مرحلة تبديل الاسنان اللبنية، كان بابا و ماما يقولك ايه؟ خودها ارميها من الشباك و قول “يا شمس يا شموسة خودي سنة الجاموسة و هاتي سنة العروسة” ، بغض النظر عن كمية اللا منطق في الموضوع و تأثيره بشكل مباشر او غير مباشر على الصحة العقلية للطفل المصري .
2. ابو رجل مسلوخة :
الكائن الاسطوري الي هيخطف الاطفال الصغيرة الوحشة الي مبتسمعش الكلام. بغض النظر ان بيبقى فيه فعلاً اطفال لا تتطاق بس مش لدرجة اني اعرفه مصطلح “مسلوخة” و هو مكملش 3 سنين
3. امنا الغولة :
كائن خرافي انثوي اخترعه المصريين عشان المساواة و كده. مينفعش يعني تبقى كل الكائنات الاسطورية المرعبة ذكور! امنا الغولة ديه المفروض انها مرعبة اكتر من اي حد و بتخطف الاطفال الوحشيين الي مبيسمعوش الكلام واللى بردة مستنياك بليا لما رجلك تطلع من تحت الباطنية عشان تخدك .
4. اوضة الفئران :
“لو مبتطلتش زن هنوديك اوضة الفئران” و لحد دلوقتي محدش يعرف فين اوضة الفئران و بعدين اشمعنى الفئران؟