إلي كل أب وأم قرر يفصل ابنه أو بنته عن الجنس الأخر بحجة العيب والحرام وإنهم أجدر الناس خوف علي مصلحتهم بحجة أن الولد لازم ميكنش فحياته بنات علشان العيب والحرام وكأن أنهم يعزلوه عن الجنس آخر أتخلق معاه ده إلي هيمنعه انه يعمل العيب والحرام .. لما يقولوا للبنت مفيش حاجه اسمها صداقة مع ولد ومفيش خروج حتي مع صاحباتك البنات والي عايزك يجيلك البيت .. إما بالنسبة للولد فـ أنت يا حبيبي بدل ما تسهر بره هات أصحابك البيت ويباتوا معاك كمان وكان ده إلي هيمنعهم أنهم يعملوا العيب والحرام ده إلي هيمنعهم أنهم يتفرجوا علي أفلام بورنو .. يمارسوا عادة سرية ..ده إلي هيقف قصادهم قبل ما يبقوا شواذ رسالة ليكم أزاي مش قادرين تشوفوا إنكم بتقفوا ضد الطبيعة بأنكم تفصلوا الجنسين عن بعض الطبيعة بتقول ان كل واحد محتاج للتاني .. كل واحد بيكمل التاني سواء كانت صداقة أو ارتباط ، ربنا خلقنا علشان نكمل بعض مش علشان ننفصل عن بعض .. حياتنا تكامل مش انفصال أزاي هتقدر أو هتقدري تشوفوا نفسكم آباء وأمهات مثالين وانتو بتعلموا ولادكم العنصرية وان الجنس الأخر ده مرفوض تماما في حياة كل واحد مننا دي مش بس عنصرية ده كمان تناقض أزاي يحب أمه ويرفض وجود بنات في حياته أزاي تحب أبوها وترفض وجود أي ولد في حياتها ..منتهي العبث والانفصام والتناقض موجودين في التربية إلي المفروض يخرج بعدها الأولاد قادرين يتعايشوا في المجتمع من غير أي ازدواجية