إيه اللي يرضيك؟
كرهوني فيكِ
قالوا فيكِ وفيكِ
وأنا وحدي بس
اللي عارف إيه
اللي فيكِ
ما أنا طول عمري
في حضنك
مدفياني ومدفيك
وحياتي من غيرك ماتساويش
ماأنتِ بيا وأنا بيكِ
بس دلوقتي مابقتش عارف
إيه ياحبيبتي يرضيكِ
يرضيكِ يكون خدي مداس
للي طغوا فيكِ
ولاأبيع نفسي
للي ظلموكِ وبيدفعوا فيكِ
وأكون مع اللي
باعوا مصانعك ونهبوا أراضيكِ
واللي بيشبعهم جوع شعبك
وبينسواماضيكِ
واللي بيسعدهم حزنك
ويتمنوا يفرحوا فيكِ
تعبت
ومش عارف
إزاي ياحبيبتي أرضيكِ
علموني زمان
إنك أنت ياللي
رافع راسي عالية لفوق
تبقى أبويا
وأنت ياللي
وخداني في حضنك
تبقي أمي
وإن الدم إللي بيجري
في عروقي
هونيلك
والقلب إللي بينبض
بين ضلوعي
هوعمرك
لكني فجأة صحيت
على صوت شهيدك
بينادي
ألحق يا أخويا
قتلوني في التحرير
ونهبوا أرض بلادي
وباعوا أرضي رخيص
واشتروا بفلوسنا
القصور بره
ياأخويا قولهم:
دي الفلوس ياأخوانا
في تراب أرضنا
ماتساويش ذرة
ياصبرأيوب
أمتى حقوقنا تعود؟
وأمتى هاترجع
فلوسنا من بره؟
وأمتى يا مصري
ترجع ورايتك
عالية لفوق
وتقولها بأعلى صوت
أناالمصري
بيتعمل لي ألف حساب
وأقودجيوش عصري
ساعتها بس
ها أقول
قدرت يا مصري أسعدِك
وأرضيكِ
وارفع علم مصري