عايز تسافر , تشوف مناظر طبيعية , معالم اثرية , جو راقي , فنادق شيك , مطاعم هادية .
عايز تروح اسبانيا ؟ تذكرة طيران 2680 جنيه , فندق Olivia plaza برشلونة 150$ الليلة او Eurostars Madrid 137$ شامل الفطور , مصروف يومي تنقلات + وجبات 50$
تيجي نروح فرنسا ! 2950 جنيه تذكرة , فندق فريزر لو كلاريدج شانزليزيه 3850 جنيه الليلة او استمتع بالاقامة في احد فنادق الحي السابع عشر كونكورد لا فاييت 1580 جنيه الليلة
مصروف يومي تنقلات + وجبات 40 يورو .
عزيزي المواطن البسيط , ممكن تستمتع بالمدن دي في خيالك , او تروح هناك اسبوعين و تصوم باقي الشهر لما ترجع .
بس في حل تالت ….. تعالي اسكندرية
فندق سانجيوفاني 560جنيه الليلة , حيث الجو الساحر المطل على شواطئ البحر الابيض المتوسط بخليج ستانلى فى مشهد بانورامى بديع ,لا تدع ان يفوتك ليلا الاستمتاع بموسيقى البيانو فى جو رومانسى فريد اثناء استمتاعك بوجبات الماكولات البحرية ذات الطابع الايطالي سعر الوجبة 140-200جنيه
انسي كل حاجة شاغلة بالك بتاكسى الساعة 12 بالليل من سان ستيفانو للقلعة حتعدي علي كوبري ستانلي بطرازه المعماري الفلورنسي الإيطالي حي الحكايات الأرستقراطية .
علي شمالك ارقي و اقدم عمارات علي البحر علي الطراز الايطالى والانجليزى … حاجة معمولة بمزاج وفن وذوق عالى , مطاعم كلاسيكية , محلات ايس كريم , و بياع كتب و قصص قديمة علي الرصيف حياته امتع قصة فيهم .
برد , رقي , عبق الابنية القديمة اللي ملح البحر جمل منظرها من سنين , اغنية عبد الوهاب في التاكس , علي يمينك البحر و ناس قاعدة علي الكورنيش بتبص , تفتكر و تدمع , او اتنين اديهم في ايد بعض بيحلموا يعدوا من هنا كل يوم مع بعض لغاية ما البحر يجف . انزل محطة الرمل , سينيمات الاسكندرية و اكشاك الكتب القديمة ريحة الفشار و اضواء المحلات وزحمة الناس بتدفي بعض .
كراسي محطات الترام العتيقة , ليها ريحة زمن و ذكريات متتحطش في كلمات.
اسكندرية , تاريخ و علامات, رقي , برد و هدوء , بحر و ليل مش حتلاقيه غير هنا …. عايز تحس انك شخص ارستقراطي راكب افخم عربية , لابس بلطو و ساعة اورينت عمرها 40 سنة … تعالي السكندرية .