هذه هى الرسالة التى نشرتها صفحة عايز مسرح على الفيسبوك وشارك بهذه الحملة عدد كبير من الفنانين :
بدأت يوم 21 أكتوبر 2014 بطلب مباشر لرئيس الجمهورية إني أكون مسئول تماماً عن أي مسرح مهجور ومتهالك تابع للدولة لمدة 3 سنين
بالمناسبة ده كان قبل خطاب رئيس الجمهورية لما قال الشباب فين وأنا محتاجك.. أمين؟
عملنا معاينات وحددنا المسرح واخترنا مسرح الفردوس المقفول والمتهالك واللي وزارة الداخلية عايزة تهدّه عشان تعمل توسعة لمعسكر أمن مركزي!!!
قفلوا المسرح لدواعي أمنية، ورغم كده دخلت صوّرت جوّه عادي محدش قالي طالع عند مين يا أستاذ!
فضلنا نضغط لحد م الرئاسة اتصلّت بيّ ورحت قابلتهم
شرحت الفكرة.. وانبهروا بيها.. ووعدوني أستلم المسرح خلال أسبوع
الأسبوع ده فات من 4 شهور، قطعوا كل وسائل الاتصال بينا وبينهم ونفضّولنا!
حد يسألني ويقولي انت عايز مسرح ليك لوحدك يعني تقدّم فيه ستاندب كوميدي؟
أو يقولي ده وقته يعني المسرح بتاعك ده؟
أو يسأل طب إيه الفايدة؟
مبدئياً أنا مش عايز من الدولة مليم أو أي حاجة غير مفتاح المسرح!!
واحنا هنقدر نوفّر للدولة فلوس بعد 24 ساعة من استلام المسرح..
اقرأ ايضاً : “عايز أتجوز” .. حملة لطلاب إعلام القاهرة
مع فريقي هنتكفل بكل حاجة فى مسرح الفردوس، وننظم:
– مهرجانات لفرق المسرح في الجامعات
– مهرجانات مسرحيات الشخص الواحد
– مهرجانات مسرحيات الديو دراما
– مسرح طفل
– مسرح عرائس
– حفلات ستاندب كوميدي
– حفلات غنائية
– ورش تعليم والتدريب على فنون كتير (مزيكا- رسم- تمثيل- ستاندب كوميدي..إلخ)
– حفلات توقيع كتب
– ندوات شعرية وأمسيات ثقافية
مصر فيها عدد مهول من الموهوبين اللي بيشتغلوا في مجالات غير موهبتهم عشان أكل العيش، وفي موظفين بتاخد مرتبات عشان بيشتغلوا في مسارح وهم مش طايقين شغلهم! واحنا بندفع ضرايب.. والمسارح مقفولة
المشروع ده هيوفّر:
– مناخ محترم لمواهب كتير، وربح مادي
– فرص عمل كتير (التشطيبات والترميمات)
– تنشيط حركة السوق في مواد البناء
– فن مُحترم يواجه العك اللي بيحصل ده
جدير بالذكر:
المسرح مليان مساحات إعلانية بمختلف المقاسات
فيه أكتر من 600 كرسي
أكتر من 15 أوضة للورش الفنية والممثلين والمكاتب
بطلب أدير #مسرح_الفردوس .. بدون أجر
معانا؟
طيب الحملة رافضة رفض قاطع أي مساهمات مادية
لكن بنرحّب بكل اللي #عايز_مسرح وبيعمل شير وريتويت لتحركاتنا وأفكارنا
شكراً جزيلاً
وهذه مجموعة من الهاشتاج الخاصة ب#عايز_مسرح وتعليقات الكثير عليها .