غلطات كتير بنقع فيها كناس بتكتب سواء فى مواقع إلكترونية وبلوجات أو على مواقع السوشيال ميديا أهمها على الإطلاق الغلطات الإملائية، أنا نفسى قعدت أعدّل الغلطات اللى عملتها قبل ما الموضوع يظهر للنور.
مينفعش تكون واحد بروفيشنال فى مجالك ولسة لحد دلوقتى مبتعرفش تكتب عربى صح، عارفين إننا بنستخدم مصطلحات إنجلش كتير فى مجال عملنا، بس فى نفس الوقت إنت عايز تثرى المحتوى العربى وتزود الداتا اللى عليه، إزاى حتعمل كدة وإنت مش عارف تكتب أصلاً أو حتى لما بتكتب بتكتب غلط؟!
من خطايا السوشيال ميديا تحديداً إنك تكتب بالفرانكو، إنت مقدر المصيبة اللى إنت عملتها دى ؟!
الناس ممكن تكتب فرانكو وتسألك فرانكو بس لو إنت رديت عليهم فرانكو هتقلّ من نظرهم، عامل جمهورك زى ما بيحبوا، لو هو بيسألك بالعربى جاوبه بالعربى لو بيسألك فرانكو جاوبه برضه بالعربى، لو بيسألك إنجلش عندك حلين أفضلهم إنك ترد عليه بالإنجلش وأسهلهم إنك ترد عليه عربى.
إياك تنزل بوست إنت مش متأكد إنه مفيهوش أى غلطات إملائية، يا إمّا هيتحفّل عليك للصبح، مفيش مانع من نظرة سريعة فى أقل من 30 ثانية على الكونتنت اللى هتنزله، تتأكد هل مظبوط ولا لأ، علامات التنصيص لو عرفت تظبطهم تبقى عمدة.
المهم فى أساسيات كدة هنقولها تمشى عليها والدنيا هتبقى زى الفل ان شاء الله.
* بنكتب: إن شاء الله مش انشاء الله.
* بتتكتب: قوله أو قولتله أو عملته أو عمله مش قولتلو وقولتلو أو عملو.
دى إسمها هاء الضمير، المفروض تبقى قلت له أو عملت له بس عادى دى عامية.
* بتتكتب: إنت وإنتِ مش إنتا وإنتى، وممكن تتنازل عن الهمزة لإن دى عامية برضه والناس مابتركزش مع الهمزات اوى.
* بتتكتب: عملوا أو كتبوا، مش بنشيل الألف والواو لأنها فعل ماضى تام مبنى للمعلوم والواو واو الجماعة مبنى على السكون فى محل رفع والالف فارقة.
* بتتكتب: هى و هو و هذا و هذه مش هوا و هيا وهازا وهازهى، ده إسمه هوهوة كلاب لامؤاخذة وفى فرق بين الذال اللى بتخرج فيها لسانك لبرة و الزال اللى بتتنطق عادى جدا.
* بتتكتب: على مش علي ودى اسمها ياء لينة وبتبقى ألف ساكنة مفتوح ما قبلها أمّا علي ده إبقى كلمه فى التليفون.
* بتتكتب: والمصحف مش و المصحف، الواو العطف بتلزق في الكلمة اللى بعديها مش منفصلة عنها.
* بتتكتب: حاجة وجماعة ورحلة مش حاجه وجماعه ورحله، إسمها تاء مربوطة مش هاء مربوطة، فى فرق كبير بين الإتنين، الهاء للضمير والتاء للكلمات.
* بتتكتب: مثال ومن حيث وثابت مش سابت ومن حيس ومسال، السين اللى إنت بتبسبس بيها دى غير الثاء اللى بتخلى فيها لسانك بين سنانك كدة عشان تطلع صح.
* بتتكتب: النهاردة مش النهارضة.
* بتتكتب: خطير ومضطر مش ختير ومضتر كدة يبقى إنت بتتدلع.
وآخر حاجة بقى
* بتتكتب: ماعملتش و ماعرفش وماسمعتش لكن إياك فاهم معنى إياك إنك تكتب مش عرفت و مش عملت ومش أسمع، هيتعلم عليك فى أى حتة وأى مكان بعد كدة
الحاجات دي ممكن تحس إنها تافهة ومالهاش لازمة، بس هى دى اللى بتعلّيك فى الأول وفى الآخر وبتبين للناس اللى بيتابعوك إنك راجل فاهم ومستوعب الأشياء وقاري
قولولي بقى بكل صراحة وبكل وضوح كام غلطة إملائية من اللى فوق دول وقعت فيهم؟
الكاتب/ صفى الدين أحمد