انتشرت على صفحات الفيس بوك “بوست” بعنوان النصائح السبع على هشتاج يحمل نفس الاسم.
لقت النصائح إعجاب أكثر من 2000 شخص فى وقت زمنى قصير، ومشاركة ما يقارب الـ400 شخص، أسلوب النصائح مضحك للغاية وممتع لذا قررنا أن ننقلها لكم كما كتبها صاحبها
بص يابني النهارده الجمعه… وفيه شباب كتير انت ممكن تكون واحد منهم او تعرف حد منهم مقبلين علي خطوه انتوا مش قدها… وافتكر اني قولتلكوا مش قدها
هتنزل من بيتك وتروح بيت تاني عشان تعمل حاجه هتفضل تندم عليها العمر كله
ولذلك اقدم لك النصائح الاتيه
…وانت رايح تخطب لازم تبقي عارف ان فيه اسكيما معينه الناس كلها بتمشي عليها … وانت برده هتمش عليها من منطلق” هذا ما وجدنا عليه ابائنا واجدادنا “
اول حاجه في اليوم ده في الغالب ..بتبقي جايب قميص جديد …وفي الغالب بيبقي ماركه كويسه …اما البنطلون بتجيب اي حاجه عشان مبيبانش اوي ..وبعدين حماك مش هيركز اوي مع نصك التحتاني والا يبقي راجل مش تمام
تاني حاجه بتجيب تورتايه من ساليه سو كريه .. او علبه الشوكلاته ام 230 جنيه من باشونيل …او اكتر بقي حسب الناس اللي انت رايحلهم …وحسب الفلوس اللي اتبقت بعد ماجبت الجزمه والقميص… بس خد بالك.. اوعي تجيب ورد…. اوعي بجد… احنا في مسر يبني… متخليش حماك يبصلك علي انك شاب متني وهيستهفأك.. او يقفش عليك طول القعده عشان عارف ان الورد ده مصيره الزباله ومش هيستفيد بيه بعد ماتتأندل تمشي
تالت حاجه …لو معاك عربيه هتغسلها عشان لو مودي اخوها نزل يوصلك بعد لقاء القمه …يلاقيها مغسوله … ولو مش معاك عربيه فهتوقف مودي جنبك لحد ما تركب تاكسي ..عشان يعرفوا ان انت مبذراتي ومبتفرقش معاك الفلوس …مع انك هتركب من اخر الشارع ميكروباص اول فيصل عادي جدا
رابع حاجه ..هتقابل راجل رخم وكئيب وفي الغالب هيبقي بشنب شبه شنب القاضي و.هتسمع كلام كتير من نوعيه …والله عصمت ..بتشكر فيك وفي اهلك …واحنا مش هنلاقي احسن منك …وهيشكر في اهلك اللي مايعرفهومش ..وفي اخلاقك اللي هو متأكد انها متفرقش كتير عن اخلاق مناخير السبكي …بس عامه يعني مفيش مقطف غيرك اتقدم في موسم التزاوج السنه دي فيلا مش مهم اي حد والسلام
خامس حاجه هيحاول بأسئله ساذجه ومكشوفه يعرف مستواك المادي … قال يعني بيطمن عليك …بس هو من جواه بيبقي عاوز يطمن … لما يجي يقولك انت عليك اوضه النوم والصالون والسفره والمطبخ والاجهزه و انا عليا واحد هاهاها … هل هتقدر تشيل الليله ولا لأ وهتفيص منه
سادس حاجه … كل واشرب علي قد ماتقدر ومتتكسفش …عشان لو الموضوع كمل وبقيت من اهل البيت مش هتاكل عندهم غير بقسماط بعد كده وهتحبس بشاي وشاي كشري كمان من غير نعناع اللي هو علي اساس انك بقيت من اهل البيت وكده
ولو مكملش وده الاحتمال الاكبر …حيث ان بين كل 8 ارتباطات في حياه الانسان المصري 7 منهم بيتفركشوا ….طبقا لاستبيان رأي عملته مجله ميكي.. اهو تبقي استفدت واكلت وشربت
سابع حاجه بقي لما الموضوع يبوظ عشان اتخانقتوا انت وابوها علي مين اللي عليه سلك الدش … وهو قالك سلك الدش دي علي العريس معروفه او واتيفر اتخانقتوا علي ايه …وانت قفشت …متزعلش … متبتديش تسمع اغنيه عبد الرحمن محمد لاقعدن علي الطريق واشتكي …عشان خاطري متسمعهاش …وحياه البوست يا جدع …الطريق كله طينه وهتدهول نفسك … ده حتي عبد الرحمن بقي بيقعد في كوستا دلوقتي
وعاوزك لما الموضوع يبوظ متزعلش و افتكر ان اليوم ده وانت نازل امك بصتلك وقالتلك …روح يابني …ربنا ينجيك من كل ضيقه