قال المخرج عمرو سلامة ” أنا مع مصر وعلشان كده أنا ضد النفاق، وتعليق مشاكلنا على شماعات، وعدم محاسبة المسؤلين، واللي كذبوا أو خبوا الحقيقة، ضد كمان اللي يهين مصر، بأنه يأذي أو يهين أولادها، ويهملهم ويجنبهم”.
وأضاف سلامة – عبر حسابه الشخصى بموقع التواصل الاجتماعى فيسبوك – علشان أنا مع مصر فأنا ضد اللى يقمعها ويسرقها وينهبها ويحرجها قدام دول العالم، أنا مع مصر وعلشان كده أنا ضد اللي يختزل مصر في شخص أو سلطة أو رمز .
وتابع “أنا مع مصر وعلشان كده أنا ضد عواجيزها، مش بالسن، لا بدماغهم الحجرية الديناصورية، ومع شبابها، حتى لو كان عندهم ميت سنة بس مركزين في المستقبل مش في الماضي، ومع مصر وعلشان كده ضد معادلاتها الصفرية، علشان طرف يعيش لازم الأطراف الثانية تموت، ضد أطراف بيلعبوا لعبة ريست على طربيزة، الكسبان ياكل عليها والخسرانين يكسروا رجلين الطرابيزة علشان تقع بينا كلنا، واختيار أننا ناكل كلنا سوا عليها مش مطروح “.
واستكمل “أنا مع مصر علشان كده ضد الأفاقين، اللي بيمجدوا ويطبلوا وينافقوا، حب مصر الحقيقي هو في الكشف والمصارحة ومحاسبة أي مخطئ، مع مصر وعلشان كده بكره الشعارات، الشعارات أقذر ما فينا، لا (تحيا مصر) هتبني دولة، ولا (الإسلام هو الحل)، ولا الأمة العربية حاجة غير شوية دول بتجري على مصالح حكامها، ولا الثورة كمان مستمرة، واللي يؤمن بالشعارات ما يجبش من بنت عمه عيال”.
واستطرد “مصر وطن، وحب الوطن لا يمكن يعيش لو فضل من طرف واحد، مصر مش وحشة خلقة، بس علشان مصر تحبنا زي ما بنحبها لازم نحبها صح، ومعظمكم بتحبوها غلط، أو فاكرين أن حاجة ثانية أو حد ثاني أو شعار ما هو مصر”.