كتير من المصريين كانوا بيتكلموا الفترة اللي فاتت علي القطة المصرية سندباد اللي هربت من مصر لبريطانيا في سفينة شحن وفضلت حوالي ٥٠٠٠ كم و ١٧ يوم مستخبية في حاوية علي السفينة من غير ولا مياة ولا أكل لغاية ما وصلت بريطانيا والبوليس إكتشف إنها موجودة هناك وجابولها الإسعاف وطاقم الرعاية الصحية والشعب البريطاني إتبرع ليها بأكتر من ٤٠٠٠ جنيه إسترليني (٤٧٠٠٠ جنيه مصري) عشان يتحملوا مصاريف رعايتها في ملجأ الحيوانات الأليفة، مش بس كده ده فيه ناس كتير حقدوا علي القطة و عملوا عليها كاريكاتيرات !!
الجميل إن القطة سندباد ما كانتش أول حيوان مصري يحصل فيه كدة،
الحصان اللي في الصورة ده إتولد في مصر وكان حيموت خلاص من المرض والإهمال الشديد بسبب إنه أعمي عماء كامل من أول ما إتولد .. لولا إن صاحب أكبر مؤسسة للرفق بالحيوان بالنمسا عرف بالموضوع .. فقرر يشتريه عشان ينقذ حياته و يوفر له حياة آمنة و مريحة …
مش بس كدة، ده مجموع تبرعات الناس للحصان المصري الأعمي في النمسا حتي الأن وصل ٥٠٠ ألف يورو ( حوالي ٥ مليون جنيه مصري )!
والحصان ده بيجيب حوالي ٣٠٠ زائر يومياً لمزرعة مؤسسة سالزبورج للرفق بالحيوان بالنمسا عشان يشوفوا أد إيه الحصان المصري مثال للصبر والعظمة..
وبالفعل الحصان دلوقتي بجييله كمان مئات اليورو (آلاف الجنيهات) تبرعات يومياً من كل أنحاء العالم و ده عشان يعيش أطول فترة ممكنة و يتوفرله حياه كريمة!
الغريب في الموضوع إن مؤسسة سالزبورغ للرفق بالحيوان عندها دلوقتي آلاف الحيوانات والطيور ،لأنها فاتحة بابها لجميع الناس من أنحاء العالم إنها تبعتلهم أي حيوان أو طائر مريض أو يتيم أو محروم من السعادة والحرية وهما حيتولوا رعايته كاملة، بس المهم إنك تدفع مصاريف شحن الحيوان أو الطائر لغاية عندهم وتكون الحالة مستدعية الرعاية… وإطمن خالص لأن اللي إنت حتبعته حيعيش عيشة ٥ نجوم ومثال علي ده الكلبين اللي في الصورة دول حد في العراق لقاهم مرميين في الزبالة في الشارع وبعتهم للمؤسسة وشايفين إزاي عايشين في أوضة خاصة بيهم بس بسرير وكنبة وسجادة وبطاطين ونجفة كريستال والأوضة مكيفة في الصيف ومدفأة في الشتا !!
الأغرب من ده كله إن فيه قسم خاص في المزرعة ديه مخصصة للحيوانات اللي بتتعالج من الاكتئاب .. الإنسانية حلوة مفيش كلام
*ملحوظة: الصورة لحجاجوفيتش مع الحصان المصري الأعمي في مؤسسة سالزبورج للرفق بالحيوان بالنمسا وفي أوضة الكلبين العراقيين في نفس المؤسسة
المقال من صفحة حجاجفيتش على الفيسبوك