اخطاء فنية تاريخية ترسخت في ذاكرة الشعوب
يعنى مثلا:
– الرسول ما كانش له أخت مغنية اسمها الشيماء
– زعماء الكفار ماكانش شكلهم وحش وريحتهم وحشة ده كانوا اغنى تجار فى العالم
– هارون الرشيد ما مكانش مقضيها خمرة ونسوان
ده كان بيحج عام ويغزو عام ولما يزوره ملك او حد مهم كان يعطيه هدية اختراع جديد لم يرى العالم مثيل له
– عيسي العوام مش مسيحي
– قراقوش ما كانش حاكم مفترى وغبى
ده كان قائد عظيم بنى قلعة صلاح الدين والقناطر الخيرية بأوامر صلاح الدين الأيوبى
– محمد على واسرته ما كانوش بيتكلموا تركى ولا عربى مكسر ولا بيقولو حظرتونا ولا افنظم
ده سفير انجلترا الحالى بقاله خمس سنين فى مصر لما قناة بتستضيفه بيتكلم عربى مصرى بلهجة الزاوية الحمرا والصاروخ صافيناز بتتكلم مصرى زى اللبلب يبقى ولاد واحفاد محمد على اللى اتولدوا وعاشوا فى مصر مش بيعرفوا يتكلموا مصرى
– الوالى محمد سعيد باشا ما كانش اهطل وديليسبس ضحك عليه بطبق مكرونة وخد قناة السويس
ده كان حاكم عظيم أول من جعل المصريين ظباط فى الجيش وعمل المشروع اللى مصر عايشة فى خيره لحد النهاردة مشروع قناة السويس وطبعا ما كانش اسمه الخديوى سعيد لان قبل الخديوى اسماعيل ماكانش فيه لقب خديوى
– الخديوى اسماعيل ما كانش مفرغ حياته للنسوان ( #سرايا_عابدين ) ولا كان بيريل على المظ وعايز ياخدها من عبده الحامولى وعبده الحامولى عمل ثورة عليه (فيلم المظ و عبد الحامولى) لان عبده الحامولى كان من حاشية الخديوى اسماعيل وكان مقرب منه جدا لدرجة ان بعد عزل الخديوى اسماعيل اعتزل عبد الحامولى الغناء وانسحب من حاشية الخديوى توفيق وفاء للخديوى اسماعيل
الخديوى توفيق ما قالش لأحمد عرابى انتم عبيد احساناتنا ولا أحمد عرابى كلمه من فوق الحصان والخديوى واقف على الأرض زى ما بيجيبوا فى الصورة العبيطة المرسومة للواقعة دى
– الخديوى عباس حلمى الثانى ما حكمش مصر ساعتين وبعدين شالوه
ده حكم مصر 22 سنة وكانت كلها انجازات بس لان الانجليز عزلوه والشعب كان بيعشقه فمش هايعرفوا يشوهوه فقرروا انهم ما يجيبوش سيرته خالص وممكن تراجعوا صفحة التاريخ بالصور
– الملك فؤاد ما كانش شحات ومديون وخامورجى والهبل ده ولا كان حاكم طرطور الانجليز بيحركوه
لانه كان عنده قصور وأراضى وكان مسؤول ملف التعليم فى عهد عباس حلمى الثانى والمشرف العام على الجامعة المصرية فى عهد السلطان حسين وكان حاكم عظيم سدد كل ديون مصر وبنى الجيش المصرى باحدث الاسلحة وتوسع فى التعليم اللى هو لعبته وعمل قفزة اقتصادية وفى عهده كانت القاهرة اجمل مدينة فى العالم تابعوا مركز كنوز لحماية التراث الثقافى واتفرج على مصر فى عهده
– مفيش حاجة اسمها الاسلحة الفاسدة
لان الموضوع بشهادة سعد الدين الشاذلى كانت اسلحة حديثة ومتطورة ولم يدرب عليها الجيش المصرى ودى كانت القضية والمحاكمات اللى عليها لانهم ما دربوش الظباط والجنود على الاسلحة مش لانها بايظة ولا بتضرب لورا زى ما جابوا فى الافلام