مرة واحد اسمه عزوز راح اشتغل صبى عند ميكانيكى، وفى يوم قال لصاحب الورشة أنا أعرف رئيس الحى.
صاحب الورشة لم يصدق، لكن بعد يومين مر رئيس الحى قدام الورشة وسلم على عزوز سلام حار جدا.
صاحب الورشة أعجب بعزوز وشغله اسطى فى الورشة.
وبعد يومين عزوز قال لصاحب الورشة أنا أعرف الوزير؛ قال له: لا صعبة جدا.
وفعلا بعد يومين مر الوزير قدام الورشة وسلم على عزوز.
صاحب الورشة اتجنن وقال لعزوز يا بنى أنا بزوجك بنتى وتمسك الورشة مكانى.
وبعد يومين قال عزوز لصاحب الورشة أنا أعرف أوباما.
ولكن صاحب الورشة قال بلاش تفشر علي.
عزوز قاله تعالى نسافر وأنا أعرفك.
وفعلا سافروا أمريكا ووقفوا أمام البيت الأبيض، وعزوز قال شوف الشباك الأبيض؛ حأطلع بعد شوية أنا وأوباما ونقول لك هاى.
وفعلا عزوز طلع هو وأوباما، بعد خمس دقائق صاحب الورشة اغمى عليه وراح المستشفى، ولما فاق سألة عزوز ليه اغمى عليك؟! علشان شفتنى أنا وأوباما؟
صاحب الورشة قال: لا. أنا أغمى علي علشان إنت وأوباما وافقين فى الشباك، مر من قدامى اثنين أمريكان بيسألونى: مين اللي واقف جنب عزوز؟!!