رثى خالد أبو النجا أخته بكلمات نشرها على مدونته الالكترونية عصر اليوم، والتى تداولها جمهور خالد ومحبى الحيوانات.
وأكد خالد فى رثائه، إن اخته ماتت نتيجة الخوف، قبل الاختناق، الخوف على موت قططها.
وقال خالد فى مدونته، التى حكى فيها تفاصيل تلقيه الخبر:-
“سلوى.. أختى
أجمل بنت فى مصر…
البقية فى حياتكم…
كنت فى مطار اليونان لما كلمنى طارق أخويا وقال لى
الحق يا خالد.. سلوى يا خالد..
سلوى أختنا.
خطفها حريق النهارده.. لما رجعت بنفسها داخل الحريق.. بيقولوا فى محاولة عشان تنقذ قططها.
كأنه امبارح لما كنت “دودى” أخوها الصغنن اللى كانت سلوى بتجيبه يتفرج على تدريباتها أو ماتشاتها فى الباسكت والهاندبول فى نادى هليوبوليس أو تاخده معاها مع الفريق فى سفريات حول العالم.
كنت أخوها الصغنن اللى ما حدش يعرفه وكنت باسمع كل التعليقات اللى بتحسدها على جمالها وحبها والتزامها الرياضى، دايمًا فخور بيها زى كل إخواتى الكبار
كلهم… فخور بيهم..
كلهم رياضيين..
كلهم جمال..
كلهم يشرفوا مصر كلها..
وغالبا كانوا السبب إن أنا كمان حبيت أكون زيهم..
سلوى أبوالنجا.. بطلة الهاندبول والباسكيت…
أجمل واحدة شفتها فى حياتي…
اتخطفت…
مش بس الموت اللى بيخطف..
الاكتئاب بيخطف
بيخطف عشان الناس بتخذلنا فبنوصل لدرجة إن مافيش بكرة نصحى له
الحزن بيخطف
الحزن بيخطف عشان بنحب ناس بيتغيروا وبيبقوا ناس تانيين!
الحزن بيخطف عشان بيحبنا ناس زى ما كنا فى يوم بس احنا بنتغير وبنكبر وماحناش زى ما احنا اللى حبوهم!
الندم بيخطف
الندم على قرارات فى حياتنا لو ماتصالحناش معاها بيخطفنا
حياتنا بتتخطف مننا… بالتدريج…
كده فى لحظة… كل الوقت… كل العمر.. كله بيخلص!
فجأة…
حريق فى بلكون الشقة يوم 20 يوليو 2015
الساعه 4 العصر تقريبا..
نجلا وسلوى لما اكتشفوا الحريق وحاولوا السيطرة عليه فتحوا باب ليمتد الحريق للشقة كلها للأسف..
وبعد ما تنقذ سلوى ونجلا
لكن ترجع سلوى للحريق
باين عشان تنقذ قططها
فتختنق سلوى من دخان الحريق مع القطط.
…
بس مش بس الاختناق اللى خطف سلوى
ولا بس القطط
ولا بس الاكتئاب
ولا بس الندم
ولا بس الحزن
ولا بس الثورة
اللى خطف سلوى مننا كلنا
غالبًا
الخوف!
الخوف على القطط اللى بقت أهلها
الخوف من بكرة بلا أمل
الخوف من الناس اللى بلا قلب
الخوف والتخويف
سلوى أختى سامعها بتقول.. يا دودى.. ماتزعلوش… أنا باحبك يا دودى:)… باحبكم كلكم، القطط ونجلا وسيوفه وطروقة وهشومة وسمسمه وكوووولكم..
وبطل موضوع الخطف ده يا ولد :)
أنا مع مامى… وها نبعت لكم من الجنه حضن وبوسة كل يوم بدل الصور اللى كنت بابعتها لكم كل يوم وادوشكم بيها :)
بس عندك حق يا دقدق…
مش قادره أقول هتوحشونى..
عشان كنتم واحشينى أصلاً..
خلوا بالكوا من بعض.. مالكوش غير بعض..
مامى قالتها.. وادينى انا كمان أهو باقولها..
باحبكوا..
:)
…
احنا بنبدأ نتخطف.. لما بنبدأ نخاف..
الخوف أذى.. والحب حياة..
البقاء لله.. البقاء للحب..
البقاء لله.. البقاء للحب..