-
من فتره قريت موضوع عن أهم قصص الحب اللى حصلت فى الوسط الفنى وكان من ضمنهم واللى كانت الأهم بالنسبه ليا هى قصة فؤاد المهندس وشويكار من وجهة نظرى هى من أفضل وأنجح قصص الحب اللى حصلت فى الوسط ده كله، أصل مش لازم تكون رحلة عمر وجواز وأولاد وأحفاد وحياه مستقره عشان نقول أنها نجحت
فى القصة دى فؤاد المهندس حب شويكار بجنون ظاهر فى كل صورهم وكمان فى كل أفلامهم جرب مره متركزش مع الصورة ولا مع قصة الفيلم متركزش مع لبسهم ولا طريقة كلامهم سيبك من كل ده وأتفرج بس على عينين فؤاد فى كل مره كان بيبصلها فيها، هتلاقى عنيه بتحب تبصلها وكأن عنيه بتحبها أكتر منه وبرغم الحب ده كله أنفصلوا ومكملوش فى جوازهم بس مبطلوش يحبوا بعض، كل اللى أتغير فى حبهم أنه مبقاش نظرات ومشاعر ظاهره وكلام يتقال…. حبهم فضل جوه قلوبهم بس والظاهر منه مجرد إحترام وهو ده أقوى مفهوم للحب لانه أى علاقه تانيه ممكن تتأثر بمشاكل كتير فى حياتنا لكن الحب اللى بجد بيفضل جوه القلوب مبيتغيرش كل اللى بيتغير طريقة التعبير عنه تحية لفؤاد المهندس الراجل اللى عرف يحب ست بجد ويحافظ عليها حتى من نفسه وتحيه لشويكار اللى عرفت تقدر حب راجل عينيه عشقتها وعرفت تحافظ على حبه جوه قلبها حتى بعد ما فارق الدنيا. وتحيه لأكتر اتنين عرفوا معنى الحب اللى بجد وقدروا يطبقوه