تطالب المرأه على كل منبر لها بالمساواه مع الرجل
ده على اى أساس ايه يا”ختى” مش كفايه المصايب إللى إنتى عاملاها من بداية الخليقه ، غاويتى أدم الغلبان وأكلتيه من الشجره المحرمه وكنتى السبب فى إتعاس البشريه أجمع
لأ ومفيش فى لسانهم إلا كلمه وراء كل رجل عظيم إمرأه
قصدك وراء كل رجل عظيم ..إمرأه تجيبه لورا
طيب وده على أي أساس ؟
على أساس إنهم اشتغلوا وتعبوا وأرهقوا مثلا ؟
ولا على أساس إنهم النجاح التام للرجل بقلة الطلبات والمصروف ؟
متهيألي إن وراء كل رجل عظيم … كارثه أو مصيبه !!!
مفيش طبعآ حد هيصدقني وليس مستبعدآ أن تخرج جمعيات حقوق المرأه تطالب بضربي بالبلغ في ميدان عام – ما ده إللي شاطره فيه الجمعيات تطالب بالحقوق من الغلابه – آه نسيت البلغ يعني جزمه يعنى حذاء بالفصحى ..
سيبكم من ده كله وخلينا نجيب صفحات التاريخ ونشوف الكلام الصح من الخطأ …
من العظماء اللي معانا على سبيل المثال يوليوس قيصر …
طبعآ الراجل معروف بقوته وجبروته وسيطرته على الإمبراطوريه الرومانيه وفي ظل قوته أحب فتاة الشرق ” كليوباترا ” …
وكليوباترا دي امرأه جابت أجل قيصر بسبب حبه لها ، فتآمر عليه حلفاؤه وقتلوه ، ده حتى بروتس صديقه الوفي طعنه ، وبعد ما كان قيصر الإمبراطور الفاتح
خدله غزتين وإتكل على الله بسبب حبه لكليوباترا …
والست كليوباترا موقفتش على كدا لأ دي كملت يا جماعه على أنطونيوس ، الراجل اللي خلف قيصر في حكم الإمبراطوريه بعد تقسيمها بينه وبين أوكتافيوس ، الواضح إن وش كليوباترا شؤم على كل الرومان ، الست قلبها كان فاتح مزار للرومان بعد قيصر يدخل أنطونيو وبرضو عند معركة أكتيوم البحريه كان وشها وش السعد عليه ..
فبعد إنتصارات أنطونيو دخل أوكتافيوس وخلص على أنطونيو والباشا حصل ملكه السابق وبكده الست كليوباترا خلصت على راجلين – وعلى فكره بسبب كده بقت سجاير نسبه لقضائها على البشر – ووراء كل رجل عظيم إيه إمرأه …تجيبه لورا
وكمان شخصيه حكمت العالم هو نابليون بونابرت ، الإمبراطور الفرنسي ، الراجل اللي مخسرش معركه منذ أن أصبح إمبراطورآ ، وخرجت العباره المشئومه تطارده ” وراء كل رجل عظيم إمرأة ” وكان وش جوزفين زي الفل عليه ، وخسر المعارك واحده تلو الأخرى لغاية ما خسر آخر معاركه وحُكم عليه بالنفي في جزيره معزوله عشان يموت هناك زي الفار ده كله بسبب إن وراء كل رجل عظيم ……. إمرأه..ههههههه
وشخصيه أخيره من أجل تلك العباره الجميله ” وراء كل رجل عظيم إمرأه “
أدولف هتلر
الراجل كان عازب وزي الفل لأ دا مية فل وأربعتاشر ، حارب العالم كله ، انجلترا ، فرنسا ، روسيا ، إحتل آسيا وأفريقيا وأوروبا ، وكان بيعمل كل حاجه بمنتهى الحريه والإنسيابيه ورمى كل المعاهدات وراء ظهره ، من البارباروسا ، ومعاهدات ألمانيا في الحرب العالميه الأولى ومكنش فيه حاجه فارقه معاه لغاية ما جه اليوم وقرر إنه يتجوز!!
كان نفسي أكون موجود في زمنه عشان أقوله انت اتجننت يا عم ، ما كنت بعقلك ، وكل اللي إنت عملته دا هينهار لكن للأسف كان قبل ما اتولد ..
وإتجوز هتلر ومفيش 48 ساعه من جوازه كل اللي بناه إنهار وفي الآخر ضرب نفسه بالنار وهو محاصر زي الكلب في برلين ، كان وشها حلو أوي عليه ..
طبعا وراء كل رجل عظيم إيه …إمرأة ..
يعني من قيصر لأنطونيو ، لبونابرت ، لهتلر ، وراء كل واحد منهم حاجة كبيره ، يحب يتجوز يخسر معاركه وحياته ويموت زي الحيوان ليه لإن وراء كل رجل عظيم امرأه …
انا قلت الأمثال دي عشان دول ناس بتاعة حروب وفرض شخصيه وما ينفعش يُقال عنهم عظماء لإن فعلا وراء كل رجل عظيم وناجح إمرأه مش مصيبه ولا كارثه ، بس عارفين ليه ؟
لإن من عادة العظماء وضع حافظة نقودهم في جيبهم الخلفي ..
فيا ترى عرفتوا السبب ؟؟