في مجتمعنا البنت اللي قربت من التلاتين بتبقي شبه القنبله الموقوته اللي اوشكت علي الانفجار، و اللي بيحاول الكل إنه يتخلص منها قبل ما تنفجر في وشه ! لو بدأنا بأهلها اللي بيشوفو إنها عنست،وإن مفيش عرسان هتتقدم لها تاني وإنهم كده اتدبسو فيها للأبد و دايما بيسمعوها كلام من نوعيه ( فرصتك في الجواز قلت .. مين اللي هيعبرك بعد كده؟ .. مين هيوافقك يتجوز واحده عدت التلاتين؟ .. ) و تبدأ الأم تكلم جارتها و صاحبتها و مش بعيد تكلم الست اللي بتجيب لها الخضار عشان تشوف عريس يتكرم و
..يتعاطف و يوافق يتجوز بنتها اللي فضيحتها بانت عليها بعد ما بقت عندها تلاتين سنه أما الأب بقي فتبدأ علامات الأسي و الحزن تبان على وشه، و كل ما يشوف بنته قاعدة و لا ماشية و لا حتي نايمة ميسمعهاش غير كلمتين ( يا تري هفضل عايش لحد ما اشوفك في بيت جوزك ؟) و لأن السؤال ميبانش هو الغرض منه التريقة و فقدان الأمل، ولا غرضه الاستفسار فعلا، فالبنت مابتعرفش ترد و كل اللي بتعمله إنها بترسم إبتسامة مش مفهومة عليوشها من غير ما تنطق نص كلمة
كل ده بقي كوم و اللي بيحصل لما البنت يجيلها عريس جاهز و كامل من مجاميعه بس البنت بعد ما عصرت علي نفسها لمونه و وافقت تقعد معاه محستش إنه هو ده الراجل اللي هي بتدور عليه .. الدنيا بتقوم و مبتقعدش .. الدنيا بتقوم و تتهد فوق دماغ البنت اللي نسيت نفسها و نسيت إنها كبرت و الناس كلها بتتكلم هي ليه متجوزتش و انها المفروض تحمد ربنا إن فيه واحد وافق يتقدم لها و يتجوزها بعد ما بقت تلاتين سنه .. مشكلتنا في المجتمع اللطيف اللي إحنا عايشين فيه إنه شايف جواز البنت هو محور حياتها، وإنها لوحدها دايما ناقصهة و مش هيكملها غير جوزها ؛ الناس في مجتمعنا مش عارفين إن البنت بتحس إنها كامله لأنها درست و إتخرجت بتقدير عالي .. بتحس إنها كاملة لأنها اشتغلت في المكان اللي هي بتحبه .. بتحس إنها كامله لأنها ناجحه في شغلها اللي هي إختارته بارادتها .. بتحس إنها كاملة لأن عندها حياتها المستقلة اللي هي أسستها و اللي حطت قواعدها زي ما هي عاوزة ..
عزيزتي بنت التلاتين كلمه في ودنك .. إوعي تحسي في يوم إن سنك كل ما بيزد بيقلل منك بالعكس .. كل سنة بتعدي عليكي بتتعلمي أكتر و تفهمي أكتر و بتوصلي لحلمك و تقربك أكتر من تحقيق أهدافك في حياتك ..
عزيزتي بنت التلاتين إوعي تحسي بأي نقص لأن مفيش راجل في حياتك، وإنك لسه ماتجوزتيش لحد دلوقتي .. عيشي كل لحظة في حياتك و اتبسطي و افرحي .. افرحي بنجاحك في شغلك .. اتبسطي بالحاجات الحلوة اللي ربنا إدهالك .. و خليكي عارفة إن نظرتك لنفسك هي اللي بتحدد نظرة الناس ليكي و خليكي دايما فخوره بنفسك و واثقه إنك تستاهلي أحسن حاجه في الدنيا .. وقتها هيجي اللي يقدرك و يكون هو كمان فخور بيكي و فخور انه اتجوز بنت التلاتين الناجحه الذكيه اللي فاهمه الدنيا صح ..