إيه الجو الغريب ده.. معقولة؟
شوارع مصر مليانة ثلج!!
الجو ده غريب على مصر
الجو بس هو اللي غريب؟؟
لما تلاقى الطالب الجامعى شايل فى إيده بدل الكتب مولوتوف…. مش غريب؟؟
لما سائق تاكسى يذبح فى الشارع على يد مسيرة بتقول إنها سلمية… مش غريب؟؟
لما مدرس يعنف بنت على سلوك خاطىء اثناء الحصة ويجى قريبها بمطواه ويشرح المدرس أمام المدرسة…. مش غريب؟؟
لما تلاقى بنات طالبات يعتدين على عميدة الكلية بمكتبها ويمزقون ملابسها…. مش غريب؟؟
لما تخرج من بيتك لشغلك وانت مش عارف هتموت برصاصة ولا تفجير ولا بالشوم… مش غريب؟؟
لما الشرطى واقف في كمينه ولّا قاعد في مكتبه وفجأه يتقتل وتتمثل بجثته على يد جماعة سلمية….. مش غريب؟؟
لما جنودك جوا حدودوك يتفجر بيهم المعسكر ….مش غريب؟؟
لما تلاقى مقاهى وكافيهات مليانة شباب عاطل وبنات بتشيش… مش غريب؟؟
لما الشعب يقوم بثورتين ولسه في ناس بتاكل من الزبالة…. مش غريب؟؟
لما تختزل 90 مليون مصرى فى 200 شخص ليل نهار على شاشات الفضائيات باسم نشطاء ولا حاسين بالشعب وكل كلامهم غير مفهوم… مش غريب؟؟
لما تكون مصر على بحرين وفيها نيل وقناة السويس وثلث أثار العالم وموارد طبيعية ولسه بتشحت…. مش غريب؟؟
لما القتل يصبح خبر يومى على التلفاز ولا أى اندهاش…. مش غريب؟؟
لما جنودنا تختطف وانت ساكت مش بتعمل حاجة…. مش غريب؟؟
لما كل المحاكمات تعطى البرءات لفساد سنين وبعد ثورة شهد بها العالم كله…. مش غريب؟؟
لما يوم الجمعة اللى كان صلاة وعبادة وزيارة الأهل أصبح ضرب وقتل وغاز ورعب… مش غريب؟؟
لما نعم لدستور 2012 تدخل الجنه ونعم لدستور 2013تدخل النار…. مش غريب؟؟
لما الشهيد يموت ومحدش يجيب حقه.. مش غريب؟؟
لما الأمل من قلوب الناس يتبخر…. مش غريب؟؟
لما كل يوم تحصل مصيبة اكبر من الي قبلها و برضه مش بنتحرك … مش غريب؟؟
لما الداخلية تحمي نظام ومتحميش شعب… مش غريب؟؟
ولسة مليون حكاية وألف قصة غريبة في مصر
وبرضه ولا أي اندهاش!!