تداول رواد مواقع التواصل الاجتماعى أشياء تحدث للمتزوجين عند الإنجاب
1- الفلوس اللي كان ممكن تطلع بيها سفرية مع صحابك هتدفعها ضريبة شهرية ثمن البيبي اللي بيعمله النونو.
2- في بداية مرحلة الزحف كل ما تمسك حاجة هتلاقيها مبلولة بسبب محاولة سابقة للنونو لتذوقها.
3- كل التحف والديكورات اللي تعبت في جمعها وأن بتجهز شقتك إما هيكسرها النونو أو هتضطر تخبيها وساعتها هيدور عليها ويكسرها برضه.
4- هتكتشف الطول اللي وصل له النونو بارتفاع الحاجات اللي بتختفي من الشقة.. لاسترداد المفقودات راقب النونو وشوف هو بيخبيها فين.
5- الحيطان اللي ضيعت وقت طويل في اختيار لونها وخليت الصنايعي يعيد دهانها أكتر من مرة علشان يضبط درجة اللون هتتحول لمعرض فني للوحات سريالية هيرسمها النونو.
6- مايغركش إن النونو حجمه صغير ده لما بينام بياخد مساحة أكبر من اللي أنت ومراتك وقرايبكم بتاخدوها.
7- هتشتري بنطلون للنونو سعره أغلى من 3 أطقم ليك رغم إن البنطلون ده يتعمل بقماش جيب بنطلونك.
8- وأنت خارج هتحمي النونو وتسرحه وتخليه زي القمر علشان تتباهى بيه بس على ما توصل للمكان اللي أنت رايحه هيكون تحول إلى طفل ينتمي لأكثر القبائل همجية على الكوكب.
9- هتستمتع جدًا بشكل النونو وهو نايم.. أو بمعنى أصح هتستمتع علشان هو مش صاحي.
10- النونو بيحب المشاركة فحتى لو لسة واكل هيقف يبص لك في الأكل لحد ما تأكله.