1- الست المصرية هي الست الوحيدة اللي بتبدأ تستعد للزواج من أول ما تتولد ولغاية ما تتجوز، تبدا أمها تشتريلها أطقم الحلل والمغارف من وهي عندها 3 سنين وتقولك: “علشان منتزنقش وقتها”.
2- الست المصرية هي أكثر سيدة في العالم بتقول لجوزها “طلقني” وهي لا تقصد معنى الكلمة.
3- هي الست الوحيدة في العالم اللي ممكن تفضل لابسه أسود حزناً على جوزها اللي مات لغاية ما هي نفسها تموت.
4- تتميز الست المصرية بقدرات رائعة في الشراء أو بمعنى أصح في الفصال، عندها مهارة إنها تاخد الحاجة أم 70 جنيه بـ 5 جنيه بس، وتحس في الآخر إن البيّاع غلبها.
5- من أهم خصائص الست المصرية حرصها على المجاملات الاجتماعية بصفة عامة.
6- الست المصرية هي الست الوحيدة في العالم اللي عندها قدرة على أنها تشيل أنبوبة غاز على دماغها وتمشي بيها عشرات الكيلومترات بدون كلل أو ملل وشايفة إنها بتعمل حاجة عادية.
7- هي الست اللي بتروح المصيف مش علشان تصيف لا علشان تفضل قاعدة على الشط تحضر الأكل لجوزها وولادها وتناولهم الهدوم بعد ما بيطلعوا من البحر وتفضل سعيدة جداً.
8- هي الست اللي اسمها بيفضل سر وعيب وحاجة متتقالش لا قدام صحاب جوزها ولا بين زمايل ولادها.
9- هي الست الأكثر إيماناً بنظرية “مفيش حاجة بتخسر”، وتلاقي نص شقتها علب وبرطمانات وكراتين فاضية.
10- هي أكثر ست بتشتكي من عدم مساعدة زوجها ليها في أعمال البيت وفي الوقت نفسه بتعلم ابنها إنه راجل ومش المفروض يساعد مراته في شغل البيت.
11- هي أكثر ست مؤمنة بالحشمة جوه البيت وبره البيت.
12- هي الست اللي قضت نص عمرها في المطبخ بتعمل حلل محشي وملوخية والنص التاني بتغسل المواعين اللي عملت فيها المحشي.
13- هي الست اللي بقالها 10 سنين بتطلب من جوزها يجيبلها ورد ولسه عندها أمل إنه يجيبلها لغاية دلوقتي.
14- هي الست اللي مصممة تبقى مع جوزها دنيا وآخرة.
15- هي الست اللي بتؤمن بنظرية إن الدايت أقوال لا أفعال.
16- هي الست اللي شايفه نفسها محسودة من جيرانها وطنط سوسو ونادية مرات خالو إبراهيم وأم حسين البوابة.
17- هي الست اللي بتبدا حياتها الزوجية تتدهور لو فات على جوازها شهر بدون حمل.
18- هي الست المؤمنة بأن تربية الأبناء تتلخص في الجملة دي: “والله لما يجي أبوك لأقوله”.
19- هي الست اللي الخروج عندها يعني حلل محشي وصواني جلاش وكيكة وترمس الشاى.
20- هي الست اللي لما تضحك شوية تخاف علشان ضحكت وتستنى مصيبة جيالها.
21- هي الست اللي مؤمنة بأن العيد يعني غسيل سجاجيد.