انتشر على موقع التواصل الاجتماعى (فيس بوك) منشورًا طريفًا يعرض قصة قصيرة توضح ما يسمى بـ (عقدة الخواجة) وجاء نص المنشور كالتالى:
في مول شهير بالقاهرة، وفى المطعم المرفق بالمحل تجلس فتاتان من الطبقة الراقية، ترتديان أفخر الثياب، وتبدو عليهما أثر النعمة ..
وفجأة مرّ شابٌ أسمر بلحية طويلة كثة ومعه زوجته المنتقبة وولده الصغير.
كان الشاب يرتدي تي شيرت سوداء على سروال رمادي ! أى نعم ، سروال فضفاض رمادى، تماما كالسراويل البيضاء التى يرتديها الناس “تحت الجلابية”
فدار الحوار التالى:
الفتاة 1 : ايده ايده ، بُصي بُصي على الراجل ده
الفتاة 2 : يانهاااري ! إيه القرف ده !
الفتاة 1 : أنا مش فاهمة الناس دي بتفكر إزاي ! جاي المول “بالأندر ويـر” !
الفتاة 2 : مش ممكن، الناس دي ايه ! معندهاش سينس !
الفتاة 1 : أنا مش مصدقة بجد !! الناس دي بجد بتشوه صورة الإسلام ! هم فاكرين نفسهم كدة بيقلدوا الرسول!
الفتاة 2 : لأ طبعا ! سيدنا محمد كان شيك جدا وبـيـلبس أشيك هدوم
الفتاة 1 : أنا مش قادرة أصدق ! لو حد أجنبي شاف المنظر ده هايقول على المسلمين ايه!
وفجأة صاح الشاب الأسمر مناديا على ابنه : Hey Abu Bakr , come here .. come on
فضحكت الفتاتان من الدهشة !
فتاة 1 : ايده !! دول طلعوا أمريكان!
فتاة 2 : هههههههههه ، مش ممكن !! مش مصدقة نفسي
فتاة 1 : سبحان الله ! وايه اللي ملبسهم كدة !
فتاة 2 : يا بنتي الناس دول مش بيهمهم المظاهر
فتاة 1 : سبحان الله ، فعلا ، عَمَـليّـين أوي
فتاة 2 : اه طبعا ، حياتهم كلها كدة ، عمليين جدا جدا ، شوفي مراته كمان لابسة كوتشي مع النقاب
فتاة 1 : شكلهم تحفة بصراحة
فتاة 2 : فعلا ، الناس دي معندهاش عُقد ، حياتهم بسيطة وعملية اوي
فتاة 1 : وهو الإسلام كدة على فكرة ، دين بسيط ومرن ، مش بتاع عقد ومناظر
فتاة 2 : طبعا