فى الوقت الذى ابدى فيه الكثيريين اعجابهم بأغنية مصر قريبة .. قام البعض ممن يمتازون بخفة الظل بممارسة هوايتهم فى السخرية والضحك والتنكيت .
فإضافة الى الكوميكس التى ظهرت على الاغنية كتب البعض ان بها بعض الاخطاء التى ظهرت فى الفيديو وهى بحسب ترتيب المشاهد :
1- لا توجد حاليا فى مصر هواية تربية طيارات فوق السطوح .. انقرضت تماما ياجماعة عشان السطوح كلها بقت اطباق دش وكراكيب أو حد عاملها أوضة ومأجرها مفروش .
2- الأخ الضابط آسر ياسين اللى بيبتسم .. ازاى يعنى .. مفيش ضابط فى مصر بيعرف يبتسم .
3- مفيش مصرى بيقدر يستنى حد جوه المطار بالقرب ده .. دايما بيترمى برة بعيد والمسافر هو اللى بيطلعله .
4- برج القاهرة مغلق ومحدش بيدخله .. أكيد كانوا بيصورا فى برج تانى .
5- مفيش حد بيوزع ورد ببلاش فى الشوارع .. لو حصلت معاك قوللى ان انا غلطان .
6- محدش بيلف باعلام مصر في الشوارع دلوقتى .. ياجماعة انتو ناسيين اننا بقلنا 5 سنين مبنوصلش امم افريقيا .
7- مفيش حد بيلعب كورة فى الشارع فى منطقة نظيفة كده .. دلوقت كلة حجز ملاعب نجيل صناعى ابو 100 جنية الساعة .
8- مفيش حد بيصطاد من النيل دلوقتى اصلا خاصة فى القاهرة وكمان باليل .. اعتقد مستحيل .. ده حتي السمك بيبقى نايم .
9- طبعا مستحيل واحده تمشي في شوارع القاهرة باليل بلبس انغام ده .. وتطلع سليمة ومبتسمة وبتغنى كمان .. متستخفوش بعقولنا والنبى .
10- مفيش حد بيوزع حمص او حلابسة على الغريب او حتى على القريب .. لو حصلت معاك قولي انى غطان .
11- مفيش حد في نادي او قهوه او كافية بيسيب الكرسي الفاضي اللى جنبه لحد بالسهولة كده .. دايما بنقول لا فيه واحد جاي حتي لو محدش جاي علي امل يحط عليه كباية الشاي او شنطة اللاب وفي الغالب بيقوم من غير ما يستخدمه .
12- مفيش حد بيعزم علي حد غريب بواحد شاي في قهوه ولو جه من نفسه هيتقال عليه عبيط وممكن يترزع قلمين .
13- محدش من بتوع التحف بيوزع تماثيل علي الناس ببلاش في الشارع ولو حصلت معاك ابقي تعالي قولي برضو ان انا زفت نيله غلطان .
14- بتاع صندوق الدنيا انقرض من الستينات فى مصر يا راجل .. طفل ايه ده الي هيسيب التابلت والايفون وينبهر بصندوق الدنيا دلوقت .
15- القلعة بتقفل قبل المغرب ازاي الناس دى كانت بتغنى وتتصور فيها بالليل .
16-– الشجرة العتيقة اعتقد في النزهه في الاسكندرية ولو هيا فعلا النزهه بتقفل قبل المغرب برضو والتصوير بالليل .
غير كده الفيديو كله تمام وزى الفل وبيعبر عن مصر فعلا و بمنتهى الدقة كمان ..