من اول ما ثورنا وقلنا حرية واحنا بنتعاقب كل يوم بالدم
كل يوم شباب واطفال بتموت
كل يوم ام قلبها بيتحرق على ابنها وبنتها
كل يوم اصحاب بتسود الدنيا في عينيهم بعد فراق صديق مات
كل يوم في كام بيت بتموت الضحكة
كل يوم بتزيد الكراهية بين كل الناس
كل يوم بتموت انسانيتنا
كل يوم بيزيد الظلم
احنا ازاي وصلنا للمرحلة دي؟
ازاي وصلنا لادمان ريحة الدم
ازاي وصلنا لدرجة الكراهية.. ان كل فريق مستني يقع في ايده واحد من الفريق المضاد عشان ينتقم منه
ازاي وصلنا لدرجة تخوين حتى اللي بيموت مننا والمزايدة عليه
احنا نزلنا قلنا كرامة وحرية وعدالة اجتماعية
نزلنا نقول للظالم لأ
فاتخلق مننا كام الف ظالم!!!!!!
لحد امتى هيستمر الوضع بيزيد قسوة بشكل يرعب؟
ماجاش الوقت ان كل الدم ده يقف ونقف نفكر ازاي ننقذ ما تبقى منا؟
ماجاش الوقت نرجع نقول “ايد واحدة” بغض النظر عن إنتمائتنا؟
ماجاش الوقت الاوان نبرد نار كل أم ونقولها دم ابنك مارحش هدر
دم ابنك اتبنى بيه وطن؟
مفيش قدامنا اختيارات غير اننا نفكر ازاي نطفي البركان اللي جوانا
بركان الغل والكراهية والسواد اللي بقى مالي الشعب
عمرنا ماهنحس بامان الا لما ننشر السلام بينا
لازم نفتكر ان كلنا مصريين ولازم نبطل لهجة التخوين
لازم نبذل كل الجهد اللي نقدر عليه عشان نوقف العنف بكل اشكاله
طول ما بتبرر القتل لغيرك .. يبقى الدم عمره ماهيقف
عمر ماكان الوطن بيتبني بالكره
تعالو نصّر اننا نبتدي من جديد ونفتكر أن حق الشهيد هيجي لما تحقق حلمه اللي مات عشانه!