بالرغم من إنى ناصرى إلا إنى شايف إن المشير السيسى لايصلح لمنصب الرئيس هايطلعلى واحد يقولى هو جمال عبد الناصر كان دكتور نسا وولاده
هارد عليه واقوله إن جمال عبد الناصر حالة صعب تتكر وحتى لو فرضنا ان الفريق السيسى يحمل صفات كثيرة من الزعيم جمال عبد الناصر طب انا اضمن منين ان مايجيش بعد السيسى حد شبه السادات او مبارك مثلا
هايجى واحد تانى ويقولى اصل انت بتكره السيسى ومع نغمة يسقط يسقط حكم العسكر هاقوله ياعم الحاج والله ابدا انا اقدر السيسى جدا وبحب الجيش المصرى والتقدير والحب ده هو السبب اللى مخلينى مش عايزة يترشح وده للاسباب التاليه
اولا لو السيسى بعد اما يبقى رئيس ارتكب اخطاء تقدر تقولى هانجيب مين يشيله
ثانيا السيسى دلوقتى فى مكانه محصنه “شعبيا” لكن لو بقى رئيس التحصين ده هايقع وهايبقى معرض للمسألة والمحاسبه وهاتك يا كتابة فى الجرايد وادى اللى جالنا من ورا السيسى ده غير التريئه والنكت اللى هاتطلع عليه من الشعب
ثالثا السيسى وزير بدرجه زعيم لكن لو بقى رئيس هايبقى زيه زى اى حد هايمشى بعد 8 سنين ولو جه رئيس احسن منه هايمسح اللى عمله باستيكه
هايجى واحد تالت يقولى طب انت ترضى ان يبقى فى رئيس وفى زعيم
هاقوله اه غاندى كان زعيم وكان نهرو رئيس وزراء الهند ومانديلا كان زعيم وكان فيه رئيس لجنوب افرقيا غيره وبعدين لو السيسى ما اترشحش وجه رئيس مش على هوانا هنطالب السيسى بعزله زى ما عزل مرسى لكن لو جه السيسى رئيس هنطالب مين يعزله ما الجيش كده كده تبعه
واخيرا انا اقدر جدا الفريق السيسى واحترم الجيش المصرى لكنى اربئ به انه ينزل من درجة زعيم لدرجه رئيس