اه هما اللى قالولى .. طب اكتب اية اكتب عن مين ، اكتب سياسة يعنى ؟ سألتهم قالوا اى حاجة ، احترت حتى السياسة بقت اى حاجة اه والله هو فى اصلا سياسة ؟ احنا بقينا فى زمن اللعب مع الكبار احنا بقينا ولاول مرة من 3 سنين خارج دايرة صنع الاحداث واستقرينا فى مكاننا فى كراسى المتفرجين .. طيب الثورة .. الثورة ذى بنت أغُتصبت اغتصبها الاخوان الاول وبعدين العسكر واحنا وقفنا نتفرج الله يرحمها .. هحكى عن اية ؟
عن مستقبلنا ، القاهرة اختيرت ضمن اسوأ مدن ع الاطلاق وخدت ماشاء الله الترتيب السادس ،طيب الحلم ، كان من تلات سنين فى حلم حلم عن ان مصر تبقى بلدنا “هى مش بلدنا دلوقتى” بمعنى انه خيرها يبقى لينا منتبهدلش واحنا بنجيب الرغيف ابو شلن اللى على اد حالنا ،بلدنا اللى بتتوزع فية الارزاق والفرص بالتساوى مش عشان مين قريبى فا اشتغل فى الحتة الفلانية اللى بقبض منها كام الف كل اول شهر ،بلدنا اللى نحس فيها بانه عندنا كرامة يعنى ميروحش اخويا يجيب علاج لوالدتى فيتجرجر من قفاه ويلعن بكل قاموس الشتائم لدى البية امين الشرطة ووولى نعمته سعادة الضابط ..
بلاش نتكلم شوية عن السيول الاخيرة وعشرات البيوت اللى وقعت فى الصعيد وعن الحكومة اللى نايمة فى العسل .. وعن رئيسها اللى بيشرب من الشفشق الالمونية عشان يثبتلنا انه واحد زينا وبيشرب مية من الحنفية زينا .. “تفتكروا هى من الحنفية فعلا ولامية معدنية فى قلب الشفشق ” ماعلينا دع الخلق للخالق وكتر خيره انه عامل حسابنا وبيراعى مشاعرنا
بلاش اتكلم عن القدوة اللى افتقدناها فى مجتمع “المصالح” عن البوب وقد كان مثلنا الاعلى فى الثورية والوطنية هو فين دلوقتى اه اختار يريح دماغة ويقضيها فى النمسا وبلا مصر وشباب بلا عشوئيات ووجع دماغ ،، اشترى دماغة وسبنا وخلع .
ولا عن الذبالة ولا عن مياه الصرف الصحى اللى فى الشوارع ولا عن تلوث نهر النيل ولا عن سد النهضة ولا عن التقشف ؟؟
سيبك من دة كلة ” مصر ام الدنيا وهتبقى اد الدنيا ” وبكرة تشوفوا مصر ” وتمشوا تصحوا ” وقبل اما تفطر فكرت هتدى اية لمصر ؟