اللى اوله شرط آخرة نور .. واللى بدايته إعجاب ممكن يقلب لجواز .. فخلى بالك مش كل قطة بتنونو تعرف تخربش .. دى حكمة عرفتها من ” لواحظ ” زميلتى فى الجامعة .. مع إنى خريج دبلوم صنايع قسم امبابة .
المقال دة كتبته وأنا متكيف وعامل دماغ عالى قوى .. عارفين كلفنى كام 50 جنية بالتمام والكمال علشان اسلطن نافوخى واظبته بروقان ومعلمة .
وحبشتكه وهشتكة وأنتكة .. تسألنى ايه الحبشتكة والهشتكة والانتكة ؟ اقولك مش عارف سمعتها كده وأنا راكب التوك توك .
بس أنا عارف نيتكم سودا وضميركم مش سليم .. مع إنى سألت ” سليم ” واد عمى قال ماخبرش .. طبعا إنتم بتقولوا دلوقتى : الواد ” سوكه ” شارب حاجة .
ومتعاطى حاجة وضارب حاجة … والله العظيم ابداً .. أنا معرفش اساسا الفرق بين البانجو والملوخية .. ولما سألت الواد ” تامر إصلاحية ” .
قال : إن الاتنين لونهم اخضر .. بس واحد بيظبط المعدة والتانى بيظبط الدماغ .. واحد بيتباع بالكيلو والتانى بيتباع باللفة .. على فكرة ” تامر” دة مسافر على طول .
لا مش معاه عقد عمل فى السعودية .. اقصد يعنى دماغه طايرة على طول فى اللاوعى .. لكن أنا عامل دماغ ومبسوط قوى من شرب الشاى بالنعناع .
وشم ريحة شيشة التفاح من قهوة ” حماصة ” اللى جنب البيت ومشروبى اليومى على فكره نسكافية بالحليب وساعات كتير أشربه سادة .
لما الجاموسة اللى عندنا فى البلكونة تكون زعلانة .. وبتخبط برجليها جامد على السكان اللى تحتينا مع إننا ساكنين اساسا فى الدور الارضى .
بتقولى بعمل دماغ إزاى بال50 جنية .. اقولك ياسيدى بشترى جوزين كوارع ب70 جنية وبشترى ب150 جنية راس عجل علشان اعمل لحمة راس .
وبباقى ال50 جنية بشترى كيلو كبدة بلدى ب 70 جنية وأعيش وأتمزج .. وممكن اضرب عرقسوس او تمر هندى يهدى المعدة .
علشان أنا عامل مقاطعة لمشروبات المعلبات العالمية ماانت عارف .. لو سمحت هات لى معاك واحدة كانز سفن اب مشبره .
كان عندى صديق بيحب يشرب بيرة وكنت احب اقعد معاه علشان بس أكل الجبنه الرومى والخيار والخص والسودانى .. اسم الله عليك اسمها مزة .
طيب ماانت عارف اهه باين عليك شريب كبير قديم .. عموما أنا ماليش فى المشروبات دى خالص والحمد لله .
اهم خبر سمعته النهاردة الحاج ” عباس ” صاحب العمارة اللى أنا ساكن فيها مات .. الله يرحمه .. والحمد لله مش هادفع الإيجار تانى خلاص .
بتقول ايه : الحاج ” عباس ” وحيد ومقطوع من شجرة ومالوش قرايب ؟ ابداً والله ده متجوز وعنده كمان 6 عيال كبار .. إتنين منهم فى الجامعة .
بس اكيد الحاج “عباس ” مالحقش يقول لهم إننا بندفع ايجار كل شهر .. هايقول لهم ازاى .. بقولك مات قبل الشهر مايخلص .. إنت مابتفهمش .
امبارح شفت ماتش برشلونة وريال مدريد وميسى جاب 3 اجوان ورونالدو جاب جونين والمبارة إنتهت بالتعادل صفر صفر .. احسن علشان الجمهور يطلع حبايب .
الصبح رحت السنترال دفعت إشتراك النت بعد ماوقفت ساعة فى الطابور .. ولما رجعت البيت إكتشفت إن الواد ” سيد برشامة ” قطع عنى وصلة (النت) .
وقعدت احلف له ميت يمين : والله ” ياسيد ” دفعت الإشتراك فى السنترال ومعايا الفاتورة ، وهو يضحك ويقولى : يا سوكه ياكداب بطل تبلبع برشام .
بتقول ايه ياصاحبى .. إنت عازمنى على مشروب بينعنش ويبسط .. أنا اساسا مش بشرب فى شهر رمضان حاجة خالص ، بتقول ايه .. رمضان لسة ماجاشى .
ماانا عارف .. إنت بس اللى مخك تخين .. كنت عديها وكبر دماغك .. يعنى عديت كل اللى فات وجاى على حكاية شهر رمضان .